१५ बैशाख /अर्थ र व्यापार - नेपाल वायुसेवा निगमको जहाज अब जापानको लागी उड्ने भएको छ । निगमले जापानको नागरिक उड्डयन व्यूरोबाट विभिन्न प्रकारका भाडादर स्वीकृतिको अनुमति पाएको छ । निगमले अब जहाज अवतरणको पनि अनुमति पाउने र जापान उड्ने भएको छ । वायुसेवा निगमले दिएको जानकारी अनुसार निगमलाई ४५ दिन भित्र उडान अनुमति दिने गरी प्रक्रिया अगाडि बढाएको थियो ।

सो अनुसार तीन सातामा पहिलो चरणको अनुमति दिएको र अब फेरि यसको उडान प्रक्रिया अनुसार जहाज अवतरणको अनुमति दिने छ । यो अनुमति पनि अब छिट्टै आउने भएकोले निगमले आगामी असार १९ अर्थात जुलाई ४ बाट जापान उडान गर्ने भएको छ । वायुसेवा निगमको वाइडबडी जहाजले लामो गन्तव्यको उडान अनुमति नपाँउदा न्यारोबडीको छोटै गन्तव्यमा उड्दै आएको थियो । अब भने निमगले लामो गन्तव्यमा अर्थात वाइडबडी जहाजको भरपूर उपयोग गर्ने गरी उडान गर्न सक्छ । 

निगमको जहाजले हाललाई सातामा तीन वटा जापान उडान गर्दै छ । त्यसपछि आवश्यकता अनुसार थप गर्न र जापानको अर्को सहरमा जान पनि प्रयास गर्ने छ । हाल निमगले जापानको नागरिक उड्डयन व्यूरोबाट स्वीकृत गराएइसकेको छ ।अब निगमले काठमाडौंबाट जापान न्युनतम ४५ हजार रुपैयाँमा नै उडान गर्ने भएको छ । निगमले  गर्ने यस्तो उडानमा दुईतर्फी भने ८० हजार रुपैयाँसम्म हुने भएको छ । विभिन्न प्रकारका भाडादर भएपनि निगमले यो न्युनतम दरमा अब नेपालीले काठमाडौंबाट सीधै जापान जान पाउने जानकारी निगमले दिएको छ ।  

निगमले एक वर्षको प्रयासपछि काठमाडौं–ओसाका सीधा उडान अनुमति पाएको उल्लेख छ । यो वायुसेवाले जापानको नागरिक उड्डयन व्युरोबाट उडान अनुमति पाएसँगै अब उडान तालिका सार्वजनिक गर्ने छ । निगमले जापानबाट पाएको यो अनुमतिपछि अब काठमाडौंको त्रिभुवन अन्तर्रा्ष्ट्रिय विमानस्थलबाट ओसाकास्थित कन्साई अन्तराष्ट्रिय विमानस्थलमा नियमति उडान गर्ने भएको छ । निगमले गत असार १० गते र साउन १४ गते भित्र्याएको दुईवटा २७४ सिट क्षमताको वाइडबी विमानलाई अब भने लामो दूरीको गन्तव्यमा पालैपाले उडान गर्नेछ । निगमले जापानको अर्को गन्तव्य नारितामा पनि उडान अनुमतिको प्रयास जारी राखेको छ । यो वायुसेवाले जापानको नागरिक उड्डयन व्युरोबाट उडान अनुमति पाएसँगै अब उडान तालिका सार्वजनिक गर्ने भएको छ । निगमले यही मे १ देखि दिल्लीमा सातामा ३ वटा उडान थप गरेर दैनिक दुईवटा बनाउँदै छ ।

जापानमा वाइडबडी मात्रै जाने र यसले अहिले पूर्णक्षमतामा उड्न नपाएकाले यसैको क्षमतलाई उपयोग गरिने छ । यो विमानस्थलमा उडान गर्दा निगमको वाइडबडीले दैनिक १५ घण्टा उडान गर्नेछ । वायुसेवा निगमले ओसाकामा जाने अनुमति पाएसँगै १२ वर्षपछि फेरि जापान जाने भएको छ । निगमले सन् १९९४ को डिसेम्बर ३० देखि सन् २००७ को अप्रिल १२ सम्म नियमित गरेको उक्त उडान वाइडबी जहाजमार्फत सातामा तीनवटा उडान गर्ने गरी आवश्यक तयारी गरिरहेको वायुसेवा निगमले जानकारी दिएको छ ।