६ पुस /अर्थ र व्यापार 
नेपाल वायु सेवा निगमले आउँदो चैत भित्र थप चार देशमा उडान शुरु गर्ने तयारी गरेको छ । निगमले साउदी अरेबिया, कोरिया, जापान र चीनमा उडान गरेको तयारी गरेको हो । यसमध्ये पहिले जापानमा उडान शुरु गर्ने गरी तयारी भइरहेको निगमले स्रोतले जानकारी दियो ।

ओसाकामा फागुन मध्यमै उडान थाल्ने गरी तयारी भइरहेको र चैत मसान्त सम्म दुई ठाउँमा शुरु भइसक्ने स्रोतले बताएको छ । निगमले जापानको ओसाका र चीनको ग्वान्जाउलाई प्राथमिकता राखेर तयारी गरिरहेको छ । यी दुई गन्तब्यमा चैतभित्रै उडान शुरु गरिसक्ने स्रोतको दाबी छ । बजार बुझ्न, मुल्याकंन गर्न कर्मचारी खटाइसकेकोले तयारी तीव्र  प्रक्रियामा अगाडि बढाइएको साथै जिएसए छनोट कार्य भइरहेको , निगमका एक अधिकारीले बताए ।

करोडौं खर्चेर भित्र्याइएका वाडइबडी जहाजले नयाँ गन्तब्य नपाएपछि निगमले बजार हिस्सासमेत गुमाउँदै गएको छ । असारमा भित्र्याइएको एयरबस वाइडबडी ए–३३० ले समेत नयाँ गन्तब्य पाएको छैन । यसले पुरानै गन्तव्यमा सीमित उडान भर्दै आएको छ । निगमले बोइङ ७५७, एयरवस ३२० र वाइड बडी ए ३३० मार्फत विभिन्न सेक्टरमा दैनिक औसत ५.५७ उडान गर्दै आएको छ ।

निगमका अनुसार नयाँ दिल्लीमा हप्तामा १०, दोहा र दुबईमा समान सात उडान तथा हङकङ, क्वालालम्पुर, बैंकक, मुम्बई र बेंग्लोरमा हप्तामा समान तीन उडान गरी जम्मा ३९ उडान गर्दै आएको छ ।