१३ भदौ/अर्थ र व्यापार– अर्थमन्त्री डा. युवराज खतिवडाले मुलुक सवल अर्थतन्त्र निर्माणको प्रथम चरणमा प्रवेश गरेको बताएका छन् । 

नेपाल आर्थिक पत्रकार समाज (सेजन) को १९ औं वार्षिक साधारण सभाको बुधबार काठमाडौंमा उद्घाटन गर्दै अर्थमन्त्री खतिवडाले मुलुकको अर्थतन्त्रबारे नकारात्मक टिकाटिप्पणी नगर्न आग्रह गरेका छन् ।

मन्त्री खतिवडाले मुलुकको अर्थतन्त्र खतराको विन्दुमा नरहेको उल्लेख गर्दै सवल अर्थतन्त्रको सकारात्मक पक्षलाई केही नकारात्मक सूचकले ढाक्ने प्रयास गर्न नहुने बताए ।

अर्थतन्त्रको सकारात्मक पक्षलाई ढाक्ने प्रयास गरे सवल अर्थतन्त्र निर्माणका लागि आवश्यक आन्तरिक, बाहृय तथा निजी क्षेत्रका लगानीकर्ताको मनोबल गिर्ने बताए ।

मुलुकको आर्थिक वृद्धिदर बढदै जाने उनको दावी छ । निर्यात व्यापारका लागि क्षमता अभिवृद्धि गर्न आवश्यक प्रविधि, कच्चा पदार्थ, परामर्शदातालगायतका बस्तुहरु नेपालको लागि अतिआवश्यक रहेको पनि बताए । 

मन्त्री खतिवडाले सरकारले मुलुकलाई समृद्ध बनाउन निजी क्षेत्रसँगको सहकार्यलाई जोड दिएको जानकारी दिए ।