९ असार / अर्थ र व्यापार  - बैंक, सहकारी, व्यापारिक कम्पनी र विभिन्न व्यक्तिको समेत गरी १० करोड रुपैयाँ कर्जा उठाएर बेपत्ता भएका विराटनगरका व्यापारी विनोद दुगडलाई कालो सूचीमा राख्ने तयारी भइरहेको छ ।

राष्ट्रिय वाणिज्य बैंकले व्यापारी दुगडलाई कालो सूचीमा राख्ने प्रक्रिया सुरु गरेको छ । विराटनगरको मेनरोडमा विगत २५ वर्षदेखि कृष्णा स्टोर्स नामको विदेशी सामानको पसल चलाइरहेका दुगड गत असार ३ गते शनिबारदेखि सपरिवार बेपत्ता भएका थिए ।
 उनको पसलमा असार ५ गतेनै सिलबन्दी गरिसकेको थियो । कालोसूचीमा कर्जा सूचना केन्द्रले राख्नेछ । कालो सूचीमा राखेपछि घरजग्गा लिलामी प्रक्रिया सुरु गरिने छ । एक वर्र्ष्भित्र उनको घरजग्गा लिलामी गरेर बैंकले सावाँब्याज असुल गर्ने छ ।
  दुगडले विराटनगरको १ कट्ठा जग्गामा बनेको ३ तले घर र मोरङको सुन्दरहरैँचा नगरपालिकाको १० कट्ठा जमिन धितो राखेको छ । धितो प्रशस्त भएकाले बैंकलाई नोक्सानी नहुने छ । बैंकबाट उनले ४ करोड १५ लाख रुपैयाँ ऋण लिएका छन् । दुगडले विगत ६ महिनादेखि सावाँब्याज तिरेका छैनन् ।
 करिब २२ सय वर्ग्फिटमा ८ वटा सटर रहेको उनको पसल विदेशी सामानका लागि चर्चित थियो । पसलमा तयारी कपडा, बालबच्चाका कपडा र खेलौना, कार्पेट, गलैँचा, कम्बल, कपप्लेट, सजावटका सामग्री, थर्मसलगायत विविध प्रकारका विदेशी सामान राखिएका थिए ।