२४ पुस/ अर्थ र व्यापार - ललितपुर महानगरको मुख्य सडकमा स्मार्ट स्ट्रिट लाइट (सडक बत्ती) राखिने भएको छ । महानगर क्षेत्र भित्रको मुख्य सडकमा १ हजार स्मार्ट लाईट राख्न लागेको महानगरका मेयर चिरिबाबु महर्जनले जानकारी दिए । उनले स्मार्ट लाईटका लागि ग्लोवल टेण्डर निकाल्ने तयारी भइरहेको बताए । महर्जनका अनुसार, नेपालमै पहिलो पटक ललितपुर महानगरपालिकाले नेपाल विद्युत प्राधिकरणसँग सहकार्य गरेर स्मार्ट सडक बत्ती राख्न लागेको हो । 

स्मार्ट सडक बत्ती कसैले बाल्नु पर्दैन, अटोमेटिक बल्छ अनि निभ्छ पनि । दिउँसो निभ्छ रात परेपछि बल्छ । मानिसहरुको गतिविधी बढ्यो भने सबै बत्तीहरु बल्छ भने कम भयो भने बत्तीहरुको  पावर घट्छ थाल्छ । यदि मनिसहरुको गतिविधि भएन र सडक चकमन्न भयो भने पाँच वटामध्ये एउटा मात्रै वैकल्पिक बत्ति बल्छ । लाइटमा सिसिटीभी क्यामेरा पनिसँगै जडान गरिएको हुन्छ । सिसिटिभी क्यामेराले सवारीसाधनको इम्वोस्ड नम्वर रिड गरेर सम्वन्धित ठाउँमा पठाउँछ ।

सडक बत्ती राख्नका लागि नेपाल विद्युत प्राधिकरणका कार्यकारी निर्देशक कुलमान घिसिङसँग छलफल गरेर उनकै सल्लाह अनुसार स्मार्ट लाइट राख्न लागिएको महर्जनले बताए । प्राधिकरणले ललितपुरका मुख्य सडकमा स्मार्ट लाईट राख्नका लागि डिजाइन समेत दिईसकेको छ । ललितपुर महानगरपालिकामा अहिले इलेक्ट्रिकल इन्जिनियर नभएकाले विद्युत प्राधिकरणको सहयोगमा डिजाइन तयार पारिएको हो । इलेक्ट्रिकल इन्जिनियर राख्नका लागि प्रक्रिया सुरु गरेको महर्जनले बताए। 

स्मार्ट सडक बत्ती राख्नका लागि अन्तराष्ट्रिय रुपमा नाम कमाएमा कम्पनीहरु आओस भन्ने चाहेको महर्जनले जानकारी दिए । यसका लागि केहि नाम कमाएका कम्पनीहरुसँग छलफल समेत भइरहेको ललितपुर महानगरपालिकाले जनाएको छ । बत्ती जडानको जिम्मा पाउने कम्पनीले इन्स्टल गरेको दुई बर्षसम्म मर्मत सम्भारको जिम्मेवारी लिनुपर्नेछ । डिफेक्ट लायविलिटी पिरियड दुर्ई बर्षको राखिएको छ । 
ललितपुर महानगरपालिकाले सडकमा सोलार बत्ती जडान नगर्ने भएका सोलार लाईट फेलियर प्रोजेक्ट हो, जुनकिरी बलेजस्तो पनि सडक बत्ती हुन्छ र? उनले भने। नयाँ जोडिने स्मार्ट सडक बत्ती बालेबापत नेपाल विद्युत प्राधिकरणलाई ललितपुर महानगरपालिकाले उठ्ने बिल तिर्ने छ ।