१७ पुष  / अर्थ र व्यापार - भारतीय निजी क्षेत्रको सबैभन्दा ठूलो बैंक आइसिआइसिआइ बैंक नेपाल आउने भएको छ। बैंकले नेपाल प्रतिनिधि कार्यालय खोल्नका लागि राष्ट्र बैंकबाट सैद्धान्तिक स्वीकृति पनि लिइसकेको छ।

अब अन्तिम स्वीकृति लिएपछि बैंकले कार्यालय सञ्चालन गर्ने छ। अन्तिम स्वीकृति पाउनुअघि बैंकले नेपालस्थित कार्यालयको प्रमुख नियुक्त गर्ने प्रकृया थालिसकेको छ। ग्लोबल आइएमइ बैंकको ट्रेजरी विभाग प्रमुख रञ्जन थापालाई बैंकले नियुक्ति गर्ने तयारी गरिरहेको छ।

’आइसिआइसिआइ बैंकमा जाने प्रकृया सुरु भएको छ। नियुक्ति भइसकेको छैन’ थापाले अर्थ र व्यापारसँग भने, ’प्रमुखमा नियुक्तपछि कार्यालय स्थापनाको काम सुरु हुनेछ।’ डेढ बर्षअघि ग्लोबल आइएमइ बैंक पुगेका उनले त्याहाँ राजीनामा गरिसकेका छन्। यसअघि कतारको सबैभन्दा ठूलो बैंक दोहाले नेपालमा प्रतिनिधि कार्यालय खोलेको थियो। दुबइको मस्रेकको पनि नेपालमा प्रतिनिधि कार्यालय छ।

’अन्तर्रा्ष्ट्रिय सम्बन्ध विस्तारका लागि हामीले भारतीय निजी क्षेत्रको सबैभन्दा ठूलो बाणिज्य बैंकलाई प्रतिनिधि कार्यालय खोल्न स्वीकृति दिएका छौं’ नेपाल राष्ट्र बैंकका एक अधिकारीले भने ’यसले नेपालका बैंकहरुलाई पनि अन्तर्रा्ष्ट्रिय ब्यापार विस्तारका लागि सहजीकरण हुन्छ।’

 आइसिआइसिआइ बैंकको प्रतिनिधि कार्यालयले नेपाली बैंकहरुलाई प्रतितपत्र खोल्नलगायत अन्य होलसेल बैंकिङ कारोबार गर्न सहजीकरणको काम गर्ने छ। नेपालमा मस्रेक बैंकले गरेजस्तै काम आइसिआइसिआइले गर्ने छ। आइसिआइसिआइमार्फत नेपाली बैंकहरुले ऋण पनि पाउने छन्।

आइसिआइसिआइ बैंकले नेपालमा खुद्रा बैंकिङ कारोबार गर्न पाउँदैन। उसले यहाँ बैंकिङ सम्बन्ध विस्तार गर्नुका साथै आफ्नो अन्तर्रा्ष्ट्रिरय अनुभव बाँड्ने काम गर्छ। ’नेपाली बैंकले खोलेको एलसीलाई सहजीकरण गर्ने काम गर्छ,’ थापाले भने। 

 प्रतिनिधि कार्यालय खोल्ने भएकाले उसलाई चुक्ता पूँजीको आवश्यकता पर्दैन। आफ्नो माउ कम्पनीको नीति नियम अनुसार नै उसले नेपालमा काम गर्छ।  सन् १९९४ मा खुलेको बैंकको भारतभर ४ हजार ८८२ वटा शाखा छन्। बैंकका १५ हजार १०१ एटिएम छन्। साढे १२ खर्ब कुल सम्पपति भएको बैंकमा नेपाली बैंकरहरुले पनि केही प्रयोगात्मक ज्ञान हासिल गर्ने मौका पाएका थिए।