२९ असार / अर्थ र व्यापार – पाल्पा सदरमुकामलाई सुर्तीजन्य पदार्थ निषेध गराउने अभियान अन्तर्गत सुर्तीजन्य पदार्थ बिक्री वितरणको अवस्थाबारे अनुगमन तीव्र भएको छ । तानसेनका बसपार्क, बर्तुंङ र मेडिकल कलेज आसपासमा रहेका होटल तथा किराना पसलहरुमा गरिएको अनुगमनमा ठूलो परिमाणमा अवैध रुपमा बिक्रिका लागि राखिएका सूर्तीजन्य पदार्थ नियन्त्रणमा लिई नष्ट गरिएको छ ।

जिल्ला स्वास्थ्य कार्यालय पाल्पाको अगुवाइमा विभिन्न पसल तथा होटलहरुमा छड्के अनुगमन भएको हो । अनुगमनका क्रममा पसलमा सूर्तीको प्याकेटको बाहिरी भागमा दुवैपट्टी स्वास्थ्यको लागि हानिकारक चिन्ह नभएको पाइएको, खुल्ला रुपमा झुण्डाएर राखिएको, चुरोटका खिली बेच्ने गरेको, होटलमा खानेकुरा व्यवस्थित नराखिएको, दर्ता नगरी सुर्ती जन्य प्रर्दाथ बिक्री गरेको फेला परेकोले जफत गरी नष्ट गरिएको हो ।

अनुगमनका क्रममा सूर्तीजन्य प्रदार्थ नियन्त्रण तथा नियमन गर्ने ऐन २०६८ का बारेमा पसल सञ्चालकहरुलाई जानकारीसमेत गराइएको थियो । अनुगमनका क्रममा व्यापारीले कानुन छल्नकै लागि सामान्य ऐन नियम बारे जानकारी नभएको नाटक गर्दै अवैधानिक रुपमा व्यापार गदै आएको भेटिएकोले सामान जफत गरी नष्ट गरेको हो ।