३१ असोज / अर्थ र व्यापार- उपराष्ट्रपति नन्द बहादुर पुनले मुलुकको अवको मुख्य एजेण्डा आर्थिक सम्वृद्धि रहेको वताएका छन । गन्तव्य नेपाल न्युज डटकमको चौंथो वार्षिकोत्सवको अवसरमा आयोजित कार्यक्रममा पुनले नेपालको पर्यटन क्षेत्रको अपेक्षाकृत विकास हुन नसक्नुमा राजनितिक र सामाजिक कारणहरु प्रमुख रहेको वताए । उनले स्थानिय निकायको निर्वाचन सम्पन्न भईसकेको अवस्थामा अव प्रदेश र केन्द्रको निर्वाचन स्वच्छ र पारदर्शी ढंगले सम्पन्न गर्नु आवश्यक रहेको र त्यसपछि बनने सरकारको सम्पूर्ण ध्यान आर्थिक विकासमा हुनुपर्ने वताए । कार्यक्रममा बोल्दै उपराष्ट्रपति पुनले नेपालको सबै गाउँहरु पर्यटकीय हिसाबले महत्वपूर्ण रहेको भन्दै सातवटै प्रदेशमा पर्यटकिय गन्तव्यहरु विकास गर्न आवश्यक रहेको वताए ।

पूर्व सांसद जगदिशनरसिंह केसीले मुलुकको भविष्यका विषयमा आशावादी हुनु आवश्यक भएपनि राजनीतिक अस्थिरताका कारण ढुक्क हुन नसकिएको वताए । नेपाल पर्यटन व्यवसायी संगठनका संयोजक नवराज दाहालले नेपाल घुम्ने पर्यटकको संख्यात्मक र गुणात्मक बृद्धि समय सापेक्ष हुन नसकेको भन्दै त्यसलाई पूर्ति गर्नका निम्ति राज्यस्तर बाट पहल गनुपर्ने बताए । गन्तव्य नेपाल गु्रपका अध्यक्ष शिव अधिकारीले गन्तव्य नेपालले विगत डेढ दशक देखि पर्यटन क्षेत्रको प्रवद्र्धन र विकासका लागि भूमिका निर्वाह गरिरहेको उल्लेख गर्दै पर्यटन विकासका लागि केन्द्रिय स्तर बाट निश्चित लक्ष्य बनाएर अघि बढ्नुपर्ने बताए ।

गन्तव्य नेपाल न्युज डटकमको चौंथो वार्षिकोत्सवको अवसरमा यसै वर्ष वाट प्रदान गर्न थालिएको टुरिजम लाईफटाईम एचिभमेण्ट अवार्ड पाटा नेपाल च्याप्टरका अध्यक्ष एवं पर्यटन व्यवसायि सुमन पाण्डेलाई प्रदान गरियो । पत्रकार शरदराज सुवेदीको संयोजकत्वमा पत्रकारहरु मधुजंग पाण्डे र संगम बानिया सम्मिलित छनोट कमिटिले पाण्डेलाई छनोट गरेको हो । सम्मान ग्रहण गर्दै पाण्डेले आँफुसंग भएको राष्ट्रिय र अन्तर्राष्ट्रिय नेटवर्क राज्यको विकासमा लगाउन चाहेको वताए ।
सोही अवसरमा पर्यटन व्यवसायीहरु लोक प्रसाद दाहाल, अनिल लामा, चिरञ्जिवी भट्ट, राजेन्द्र अधिकारी, गिता गुरुङ, अन्नेली सोफिया राइकर तथा समाजसेवी रामहरी अधिकारी, राजन थापा र मोतिराम ढकाललाई पनि सम्मानित गरिएको थियो ।

त्यस्तै कार्यक्रममा नेपाल टेलिभिजनका समाचार सम्पादक राजु सिलवाल, न्युज २४ टेलिभिजनका समाचार सम्पादक संगम बानियाँ, शिखरपोष्ट मिडियाका अध्यक्ष प्रकाश खालिङ, प्वाईन्ट मिडिया प्रा.लि. का अध्यक्ष नविन काफ्ले र फोटोग्राफर जनार्दन अर्याललाई पनि सम्मान गरियो ।