१८ जेष्ठ / अर्थ र व्यापार- सगरमाथा चढेर कीर्तिमान कायम गरेको भन्दै आरोही दिकी शेर्पालाई सम्मान गरिएको छ । संस्कृति, पर्यटन तथा नागरिक उड्डयन मन्त्री रविन्द्र अधिकारीले शेर्पालाई सम्मान गरे । शेर्पाले यसै वसन्तकालीन सिजनमा सगरमाथाको सफल आरोहण गरेकी हुन ।

टुरिजम मिडिया क्लब र ट्रेकिङ गाइड एसोसिएसन (टिगान) को संयुक्त आयोजनामा भएको कीर्तिमानी आरोही दिकी शेर्पा सम्मान कार्यक्रममा सगरमाथामा फोहोर बढ्दै गएकाले सफाइमा केन्द्रित हुन मन्त्री अधिकारीले अनुरोध गरे । वर्षेनी हुने आरोहणको क्रममा आरोहीले प्रयोग गरेका सामाग्री सगरमाथामा छोड्दा फोहोर बढेकाले आरोही दिकी शेर्पालाई समेत सफाईमा केन्द्रित हुन मन्त्री अधिकारीले अनुरोध गरे । 

त्यसैगरी सांसद् यज्ञराज सुनुवारले दिकीको साहसले सम्पूर्ण नारीको शिर ठाडो बनाएको बताए । पूर्वसांसद् रामहरि खतिवडाले शेर्पाले हिमाल चिनाएको र हिमालले शेर्पा चिनाएको भन्दै दिकीले चुचुरो चुम्न गरेको साहसमा बधाई दिँदै सम्पूर्ण आरोहीको कदर हुनेगरी काम गरिनुपर्ने बताए । 

क्लबकी कोषाध्यक्ष समेत रहेकी दिकीले शेर्पाले यस वसन्तकालीन सिजनमा ‘लैंगिक समानतको लागि सकरात्मक सोच, सर्वोच्च शिखरबाट समावेशी समाजको उद्घोष’ नारा सहित सगरमाथाको आरोहण गरेकी थिईन् । संखुवासभामा जन्मेकी दिकीले यसअघि पनि मनास्लु लगायत आधा दर्जन हिमाल आरोहण गरेकी छिन ।