३२ साउन / अर्थ र व्यापार – त्रिभुवन विश्वविद्यालय (टियू) परिसरभित्र अन्तर्रा्ष्ट्रियस्तरको बहुउद्देश्यीय कभर्ड हल निर्माण हुने भएको छ । ८२ करोड रुपैयाँ बजेटमा बन्ने कभर्ड हलको युवा तथा खेलकुदमन्त्री राजेन्द्रकुमार केसीले मंगलबार शिलान्यास गरेका छन् । परिसरभित्र रहेको अन्तर्रा्ष्ट्रिय क्रिकेट मैदानको पश्चिममा रहेको खाली ठाउँमा कभर्ड हल बनाइनेछ ।

कभर्ड हल निर्माणका लागि टियूले राष्ट्रिय खेलकुद परिषद् (राखेप) लाई ७४ रोपनी ५ आना २ पैसा २.१२ दाम जग्गा उपलब्ध गराएको छ । ८२ करोड बजेट जग्गा सम्याउने, पार्किङ, रिटेनिङ वाल लगाउने कामबाहेकको खर्च हो । ७४ रोपनीमध्ये २४ रोपनी पार्किङका लागि छुट्ट्याइएको छ । जहाँ २ सय ३५ गाडी र ३ सय ८७ मोटरसाइकल राख्न सकिन्छ ।

कभर्ड हल ५ हजार दर्शक अटाउने क्षमताको हुनेछ । कभर्ड हलमा अन्तर्रा्ष्ट्रियस्तरको प्रशासनिक भवन, खेलकुद शिक्षा विभाग, पुनर्ताजगी कक्ष, म्याच अफिसियल कक्ष, खेलाडीको चेन्जिङ कक्ष, मिडिया कक्ष, इन्डोर प्राक्टिस कक्षलगायत रहनेछन् ।