१६ माघ /अर्थ र व्यापार - भद्रपुरको चन्द्रगढी विमानस्थलमा आइएफआर ’इन्स्ट्रुमेन्ट फ्लाइट रुल्स’ अन्तर्रगत रात्री उडानका लागि बुद्ध एयरले बुधबार साँझ परीक्षण उडान गर्ने भएको छ । नेपाल नागरिक उड्डयन प्राधिकरण र बुद्ध एयरको सहकार्यमा गर्न लागिएको रात्री उडान सफल भएमा आगामी शुक्रबारदेखि अरु वायुसेवा कम्पनीलाई पनि चन्द्रगढी विमानस्थलमा रात्री उडानको बाटो खुल्ने कम्पनीले जानकारी दिएको छ ।

कम्पनीका अनुसार बुद्ध एयरको ७२ सीटे एटिआर ७२ जहाजले सुरुमा बेलुका चार बजे यात्रु सहित काठमाडौ –बिराटनगर उडान गर्नेछ भने त्यसपछि बिराटनगर–चन्द्रगढी परीक्षण उडान गरिनेछ । चन्द्रगढी परीक्षण उडानका लागि यात्रु रहित जहाजमा नेपाल नागरिक उड्डयन प्राधिकरण र बुद्ध एयरका पदाधिकारी रहने कम्पनीले जानकारी दिएको छ । कम्पनीका अनुसार परीक्षण उडानको क्रममा जहाज चन्द्रगढी–बिराटनगर अवतरण गरेपछि उही जहाजले पुनः यात्रुसहित बिराटनगर–काठमाडौं नियमीत उडान गर्नेछ । जहाज राती ८ः०० बजे काठमाडौंको त्रिभुवन अन्तराष्ट्रिय विमानस्थलमा अवतरण गरिने कम्पनी स्रोतले जानकारी दिएको छ ।

आजको परीक्षण उडान सफल भयो भने बिहीबार प्रधानमन्त्री केपी शर्मा ओलीले काठमाडौं –चन्द्रगढी रात्री उडान गर्नेछन ।  चन्द्रगढी उडान गर्दै आइरहेका यति एयरलाइन्स, श्री एयरलाइन्स लगायतका वायुसेवा कम्पनीले पनि शुक्रबारदेखि रात्री उडान गर्न सक्नेछन् । हाल रात्री उडानका लागि आवश्यक एयरफिल्ड लाइट (रनवे लाइट, डिम लाइट, फग लाइट, ट्याक्सीवे लाइट)को काम सकिइसकेको नेपाल नागरिक उड्डयन प्राधिकरणका मेकानिकल इन्जिनीयनर कुल प्रसाद सिंखडाले बताए ।

गत जुनबाट सुरु भएको उक्त प्रोजेक्टको लागि १० महिनाको समयावधि तोकिएको थियो । हामीले यो प्रोजेक्ट तोकिएको समयावधिभन्दा तीन महिना अगाडि नै सक्ने योजना बनाएका छौं।’ प्राधिकरणका मेकानिकल इन्जिनीयर सिंखडाले भने ।
उनका अनुसार भिजुअल फ्लाइट रुल्स ’भिएफआर’ अन्तर्गत पाँच हजार मीटर भिजिबिलिटीमा फ्लाइट गर्दै आएका जहाजले आइएफआरमार्फत १६ सय मीटर भिजिबिलिटीमै फ्लाइट ओपरेसन गर्न सक्ने छन् ।

१० महिनाअघि  बिहान र दिउँसोको लागि आइएफआर सेवा सुरु गरिसकेको विमानस्थलमा रात्री उडान सुरु भइसकेपछि आन्तरिक उडानबाट भइरहेको एयर ट्राफिक कम हुने त्रिभुवन अन्तराष्ट्रिय विमानस्थलका महाप्रवन्धक राजकुरमार क्षेत्रीले जानकारी दिए । क्षेत्रीका अनुसार हाल बुद्ध एयर, श्री एयरलाइन्स र यति एयरले त्रिभुवन अन्तर्रा्ष्ट्रिय विमानस्थलदेखि भैरवहा, नेपालगञ्ज, धनगढी, विराटनगर, सिमरा लगायतका क्षेत्रमा राती नौ बजेसम्म उडान भर्दै आएका छन् ।  

चन्द्रगढी विमानस्थलमा दश महिना अघि बिहान र दिउँसोको लागि स्याटलाइट बेस्ड आइएफआर सेवा सुरु भइसकेको छ । इन्स्ट्रुमेन्ट फ्लाइट रुल्स लागू भएपछि भिजिबिलिटी २५ सय मीटर रनवे क्लियर भएपछि जहाज अवतरण गरिँदै आएको नागरिक उड्डयन प्राधिकरणले बताएको छ । यस अघि भिजुअल फ्लाइट रुल्स ’भिएफआर’ पाँच हजार मीटर रहेको थियो ।