१३ भदौ/अर्थ र व्यापार– बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिमस्टेक) शिखर सम्मेलनको तयारीको लागि र बिम्स्टेक सदस्य राष्ट्रका परराष्ट्रमन्त्रीस्तरीय बैठक शुरु भएको छ ।

परराष्ट्रमन्त्री प्रदिप ज्ञवालीको अध्यक्षतामा बसेको बैठकलाई सदस्य राष्ट्रका परराष्ट्र तथा बाह्य मामिला विदेशमन्त्रीले सम्बोधन गर्नेछन् । बैठक राजधानीको होटल सोल्टीमा जारी छ ।  

परराष्ट्रमन्त्रालयका अनुसार बैठकमा भोलि बिहिबारदेखि सुरु हुने बिमस्टेक शिखर सम्मेलनको तयारी, तथा हिजो सम्पन्न सचिव स्तरीय बैठकको प्रतिवेदन र बिमस्टेकका महासचिवको प्रतिवेदनमाथि छलफल हुने छ ।

बैठकले शिखर सम्मेलनका लागि समझदारी पत्र तथा चौथो शिखर सम्मेलन र काठमाण्डौ घोषणापत्रको मस्यौदालाई पनि अन्तिम रुप दिने छ ।

बैठकमा भारतको प्रतिनिधित्व बाह्य मामिला राज्यमन्त्री भि के सिंह, बंगलादेशको नेतृत्व विदेशमन्त्री अबुल हसन महमुद अलि, म्यान्मारका अन्तराष्ट्रिय सहयोग सम्बन्धी संघीय मन्त्री क्याव तिनले गरेका छन् । 

यस्तै श्रीलंकाका विदेशराज्य मन्त्री बसन्ता सेनानायके, थाइल्याण्डका विदेशमन्त्री दोन प्रमुदविनय नेतृत्वको प्रतिनिधिमण्डल बैठकमा सहभागी भएको छ ।

भुटानले भने आम निर्वाचन घोषणा भएकाले अन्तरिम व्यवस्था सचिव सोनाम छोङलाई परराष्ट्रमन्त्रीस्तरीय बैठकमा प्रतिनिधित्व गर्न पठाएको छ ।

परराष्ट्रमन्त्रीस्तरीय बैठकले मन्त्रीस्तरीय बैठकको अध्यक्षता हस्तान्तरणको साथै शिखर सम्मेलनका कार्यसूची पनि पारित गर्ने छ।