१० पुस/ अर्थ र व्यापार  - बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिम्स्टेक) को चौथो सम्मेलनका क्रममा सडक टाल्न मात्रै १० करोड रुपैयाँ खर्च भएको खुलेको छ । विभिन्न सडक मर्मत तथा खाल्डा टाल्न १० करोड २६ लाख रुपैयाँ खर्च भएको अर्थ मन्त्रालयले जनाएको छ ।

अर्थले काठमाडौं भित्रका विभिन्न सडक सुधारका क्रममा भएको खर्चको भूक्तानी मंसिरमा दिएको जनाएको छ । मन्त्रालयले मंसिरमा रकमान्तर गरी यो रकम भूक्तानी गरेको उल्लेख गरेको छ । अर्थले सम्बन्धित मन्त्रालय एवं निकायले ठेक्का तथा कामको गुणस्तर कायम गर्ने गरी रकम दिइएको पनि जनाएको छ ।

बिमस्टेक शिखर सम्मेलनका क्रममा काठमाडौं उपत्यका भित्रका सडक मर्मत गरिएका थिए । काठमाडौंको चक्रपथका अतिरिक्त विभिन्न भित्री बाटो पनि त्यस क्रममा मर्मत भएका थिए ।  भदौ १४ र १५ गते भएको सम्मेलनमा भाग लिन बिम्स्टेक सदस्य राष्ट्रका सरकार तथा राष्ट्र प्रमुखहरु नेपाल आएका थिए । विदेशी पाहुनालाई देखाउन टालिएका बाटो अहिले पूरानै अवस्थामा फर्किसकेका छन् ।