१९ माघ/अर्थ र व्यापार – अख्तियार दुरुपयोग अनुसन्धान आयोगले त्रिभुवन अन्तर्राष्ट्रिय विमानस्थलस्थित विमानस्थल भन्सार कार्यालयमा छापा मारेको छ । सोमबार अख्तियारको अनुगमन टोलीले विमानस्थल भन्सार कार्यालयका तीनजना कर्मचारीलाई नगद घुस रकमसहित पक्राउ गरेको छ ।
अख्तियारले विमानस्थल भन्सार कार्यालयको वैदेशिक हुलाक भन्सार शाखाका भन्सार अधिकृत इन्द्र न्यौपाने, सोही कार्यालयका कार्यालय सहयोगी गणेशप्रसाद पुडासैनी र सञ्चार मन्त्रालयको हुलाक सेवा विभागको पार्सल (निकासी) शाखाका नासु छविप्रसाद रिजाललाई घुस सहित पक्राउ गरेको छ ।
अख्तियारले पुडासैनीको टेबुलको घर्राबाट १० हजार रुपैयाँ , त्यही घर्रामा स्रोत नखुलेको ४० हजार रुपैयाँ र उनको साथबाट स्रोत नखुलेको ९६ हजार गरी कुल १ लाख ४६ हजार रुपैयाँ बरामद भएको जनाएको छ । अख्तियारले नासु रिजालको साथबाट २० हजार रुपैयाँ र स्रोत नखुलेको १८ हजार ८४८ गरी कुल ३८ हजार ८४८ रुपैयाँ बरामद गरेको थियो ।
अख्तियारका अनुसार घुस रकम र स्रोत नखुलेको समेत गरी कुल २ लाख ६८ हजार रुपैयाँ र विभिन्न व्यक्तिका २३ वटा मोवाइलसमेत बरामद भएको छ । उनीहरूमाथि थप अनुसन्धान भइरहेको अख्तियारले जनाएको छ ।
तपाईको प्रतिक्रिया