चीनतर्फबाट आएको भिषण बाढीका कारण रसुवागढी नाकाको पुल र भन्सारमा मालवस्तु बोकेका १ सयबढी गाडी बगायो

रसुवागढी हाइड्रोपावरको ड्याम साइडमा फसेका ५० जनाको उद्धार

96 पटक पढिएको

२४ असार/अर्थ र व्यापार – चीनतर्फबाट आएको भिषण बाढीका कारण रसुवागढी नाकाको मितेरी पुल र भन्सारमा मालवस्तु बोकेका १ सयबढी गाडी बगाएको छ । रसुवागढी भन्सार र निर्माणाधीन टिमुरे सुक्खा बन्दरगाह क्षेत्रमा १ सय भन्दा बढी गाडी बगेको प्रारम्भिक अनुमान गरिएको रसुवा जिल्ला प्रशाशन कार्यालयले जनाएको छ ।
नेपाल इन्टरमोडलर विकास समितिका कार्यकारी निर्देशक आशिष गजुरेलका अनुसार यसरी बगेकामध्ये अधिकांश मालवस्तु बोकेका सवारी साधन छन् ।
इभी गाडी भने केही पर रहेका कारण कम क्षति पुगेको अनुमान गरिएको छ । ‘ठ्याक्कै कति गाडी थिए र क्षतिको विवरणबारे पछि नै खुल्छ, प्रारम्भिक अनुमान अनुसार १ सय भन्दा बढी गाडी बगेको अनुमान गरिएको छ,’ उनले भने ।
भन्सारको यार्डमा २ सय ३० वटा सवारी साधन पार्किङ गरेर राखिएको थियो । केही गाडीहरु राति नै माथि सारिएको समेत जानकारी आएको उनले बताए । ‘अहिले घटनास्थलमा क्षतिको विवरण संकलन भइरहेको छ, त्यसपछि मात्र स्पष्ट हुनेछ,’ उनले भने ।
यसैगरी, चीनतर्फबाट आएको बाढीका कारण रसुवागढी हाइड्रोपावरको ड्याम साइडमा फसेको ५० जनाको उद्धार गरिएको छ । नेपाल प्रहरी, सशस्त्र प्रहरी बल नेपाल र नेपाली सेनाको उद्दार टोलीले मंगलबार दिउँसो १२ः५० बजेसम्म ५० जनाको उद्धार गरिएको जनाएको छ ।
उद्धार गरिएकामा ४ महिला र ४६ जना पुरुष रहेका छन् । उनीहरूलाई झोलुङ्गे पुलबाट हिँडाएर उद्धार गरिएको प्रहरीले जनाएको छ । उद्धार हुनेमा १ जना चिनियाँ नागरिक समेत छन् । सो बाढीको प्रभाव नुवाकोटको त्रिशुली, धादिङ हुँदै चितवनको नारायणी नदी आसपासका तटीय क्षेत्रका स्थानीयवासीमा समेत परेको छ । सो क्षेत्रमा अझै थप बाढी आउने त्रास कायमै छ ।

तपाईको प्रतिक्रिया

सम्बन्धित शीर्षकहरु