१६ जेठ /अर्थ र व्यापार- पछिल्ला वर्षहरुमा नियम र परिधिभित्र बसेर खर्च गर्न नसक्दा हरेक वर्ष बेरुजु बढ्दै गएको छ । अघिल्लो वर्षको तुलनामा २३ प्रतिशतले बेरुजु बढेर ६ खर्ब ६९ अर्ब माथि पुगेको छ ।

तर कतिपय स्थानीय तह यस्ता छन्, जसको एक रूपैयाँ पनि बेरूजु निस्किएको छैन । शून्य बेरूजु रहेका स्थानीय तहहरूमा सबै गाउँपालिका रहेका छन् । महालेखा परीक्षकको प्रतिवेदन अनुसार ताप्लेजुङको पाथिभरा याङवर गाउँपालिका, पाँचथरको याङवरक गाउँपालिका, काभ्रेपलाञ्चोकको महाभारत गाउँपालिका, धादिङको बेनीघाट रोराङ्ग गाउँपालिका र ललितपुरको कोन्ज्योसोम गाउँपालिको काम पूर्ण पारदर्शी तथा कानुन संवत देखाइएको छ ।

पाथिभरा याङवर गाउँपालिकाको ९८ करोड ७१ लाख, याङवरक गाउँपालिको एक अर्ब १५ करोड ६१ लाख र महाभारत गाउँपालिकाको एक अर्ब २५ करोड रकममा लेखापरीक्षण गरिएको थियो । त्यस्तै, बेनीघाटा रोराङ्ग गाउँपालिकाको एक अर्ब ३५ करोड २५ लाख र कोन्ज्यसोम गाउँपालिकाको ८५ करोड ७३ लाख रूपैयाँमा लेखा परीक्षण गरिएको छ ।

पाँच गाउँपालिकाको लेखा परीक्षणमा शून्य बेरुजु देखिएकोमा १३९ वटा स्थानीय तहको भने १ प्रतिशत भन्दा कम बेरूजु छ । सबैभन्दा बढी बेरुजु आउनेमा सिराहाको लक्ष्मीपुर पतारी गाउँपालिका छ । यो पालिकामा एक अर्ब ६४ करोड रूपैयाँको लेखा परीक्षण गरिएको थियो, जसमध्ये २५ करोड ७७ लाख रूपैयाँ बेरुजु निस्किएको छ । यो लेखा परीक्षण गरिएको रकममा २५ प्रतिशत भन्दा बढी हो ।