१४ चैत/अर्थ र व्यापार– विराटनगरका अग्रज साहित्यकार तथा समालोचक दधिराज सुवेदीको निधन भएको छ ।
विगत केही महिनाअघि देखि क्यान्सर रोगको उपचार गरिरहेका सुवेदीको ७८ वर्षको उमेरमा बुधबार बिहान ३ बजे निधन भएको हो । साहित्यकार सुवेदीका मोरङको साहित्यिक इतिहास, नेपाली साहित्यका मुस्कानहरु, सौन्दर्य कविता संग्रह, अविरल यात्रा लगायत एक दर्जन भन्दाबढी कृति प्रकाशित छन् ।
उनले आफ्नो जिवनकालमा अनेकौं कृतिहरूको समालोचना पनि गरेका छन् । स्वर्गीय सुवेदी विराटनगरका सामाजिक अगुवा पनि हुन् । विराटनगरले साहित्यिक, सामाजिक, सांस्कृतिक र धार्मिक क्षेत्रको अगुवा गुमाएको स्थानीय साहित्यकारहरुले बताएका छन।
स्वर्गीय सुवेदीको पार्थिव शरीरलाई बुधबार बिहान ९ बजेदेखि विराटनगरको परोपकार घाटमा अन्त्येष्टि गरिने उनका छोरा शरदराज सुवेदीले जानकारी गराएका छन् । स्वर्गीय सुवेदीको श्रीमती, दुई छोरा र एक छोरी छन ।