२५ कात्तिक / अर्थ र व्यापार- नेपाल लोकतान्त्रिक शैक्षिक परामर्श संघले रक्तदान कार्यक्रम आयोजना गरेको छ । शुक्रबार काठमाडौंको बागबजारस्थित टुकुचा पार्कमा संचालन भएको रक्तदान कार्यक्रम स्वास्थ्य मन्त्री मोहन बहादुर बस्नेतको प्रमुख आतिथ्यतामा सम्पन्न भयो ।

नेपालको पश्चिम क्षेत्र विशेषत रुकुम, जाजरकोट लगायत जिल्लामा गएको भूकम्पमा परि घाइते भएकाहरुको उपचारमा रगत अभाव नहोस् भन्ने उद्देश्यले उक्त रक्तदानको आयोजना गरिएको संघका अध्यक्ष दिपक गुरुङले बताए ।

कार्यक्रममा मन्त्री बस्नेतले संविधानमा लेखेर मात्र गाँस, बास, कपास र स्वास्थ्य, शिक्षाको अनुभुति नहुने भएकाले जनतालाई प्रत्याभूति दिलाउन सरकार तत्पर रहेको बताए । हरेक अस्पतालले १० प्रतिशत बेड निशुल्क गर्नुपर्ने समेत मन्त्री बस्नेतले वताए । त्यस्तै रक्तदाताले दान गरेको रगतमा ब्याग लगायत लागत खर्च लाग्ने गरेकोमा त्यो खर्च पनि सरकारले निशुल्क गराउन लागेको उनले जानकारी दिए ।

कतै समस्या परेको समय सबै नेपालीले सहयोग गर्ने नेपालीहरुको परम्परालाई निरन्तरता दिदै नेपाल लोकतान्त्रिक शैक्षिक परामर्श संघले रक्तदान कार्यक्रमको आयोजना गरेको जनाएको छ । लोकतान्त्रिक शैक्षिक परामर्श संघका अध्यक्ष दिपक गुरुङको सभापतित्वमा भएको कार्यक्रममा ७० जना रक्तदाताले रक्तदान गरेका थिए ।