१९ साउन/अर्थ र व्यापार – जग्गा बिक्री गर्ने भन्दै ठगी गर्ने एक जनालाई प्रहरीले पक्राउ गरेको छ । जिल्ला प्रहरी परिसर, ललितपुरको टोलीले ललितपुर महानगरपालिका–२८ बस्ने ३४ वर्षीय राम महर्जनलाई नियन्त्रणमा लिएको हो। अहिले उनी प्रहरी खोरमा पुगेका छन ।
महर्जनले विभिन्न व्यक्तिलाई जग्गा बिक्री गर्ने भन्दै बैना रकम उठाएर ठगी गरेको प्रहरीको आरोप छ । ‘उनले विभिन्न व्यक्तिलाई जग्गा दिन्छु भन्दै रकम लिने तर, जग्गा नदिएपछि पैसा माग्दा रित्तो बैंक खाताको चेक दिने गरेको देखियो’ प्रहरी परिसरका एसपी नवराज कार्कीले भने ।
यस्तो ठगीमा संलग्न महर्जनविरुद्ध ९ जना पीडितले प्रहरीमा उजुरी दिएका छन् । प्रहरीको प्रारम्भिक अनुसन्धानबाट उनले २ करोड ९४ लाख रुपैयाँ ठगेको देखिएको छ । पीडितको संख्या अझै बढ्ने प्रहरीको अनुमान छ ।