४ वैशाख/अर्थ र व्यापार – नेपाल मदिरा व्यवसायी महासंघको आगामी नेतृत्वको लागि पाटन ललितपुरका मदिरा व्यवसायी मुकुन्द महर्जनले राष्ट्रिय अध्यक्ष पदमा उम्मेदवारी घोषणा गरेका छन् ।
महासंघको यही ८ र ९ बैशाखमा काठमाडौंमा आयोजना हुन लागेको १७ औं वार्षिक साधारणसभा तथा १२ औं महाधिवेसनमा देशभरका मदिरा व्यवसायीहरुले नयाँ नेतृत्व चयन गर्ने कार्यक्रम रहेको छ ।
अध्यक्ष पदमा उम्मेदवारी घोषणा गर्दै व्यवसायी महर्जनले प्रेस विज्ञप्ति जारी गर्दै आफूले विभिन्न पदमा रही विगत १० बर्षदेखि यस संस्थाको हितको लागि काम गर्दै आएको दाबी गरेका छन् ।
सोही अनुभव एवं देशभरका मदिरा व्यवसायीहरुको अनुरोधमा आफूले यसपटक अध्यक्ष पदमा उम्मेदवारी दिन लागेको उनले बताए ।
व्यवसायी महर्जनले यस भन्दा पहिले २ कार्यकाल महासंघ कार्यसमिति सदस्य,१ कार्यकाल महासंघमा सह कोषाध्यक्षको अलावा मदिरा व्यवसायी संघ ललितपुरको संस्थापक र सल्लाहकारको भूमिका निर्वाह गरिसकेका छन् ।

सरकारले मदिरा व्यवसायीलाई हेर्ने दृष्टिकोणमा परिवर्तन गर्नको लागि आफू निरन्तर लागिपर्ने उनले बताए । उनले आफूले नेपाल सरकार अन्तरगत कर तथा राजस्व सम्बन्धीका निकायहरु सँग निरन्तर समन्वय र सहकार्य गर्दै अघि बढ्ने बताएका छन् ।
उनले वाइन शप कन्सेप्टलाई पूर्ण रुपमा लागु गर्ने देखि हरेक जिल्लामा आन्तरिक राजस्व कार्यालयसँग सहकार्य गरी जिल्लामा नक्कली मदिरा नियन्त्रण गर्नका लागि विभिन्न समितिहरु बनाएर आफू अघी बढ्ने सम्मका एजेण्डाहरु सार्वजनिक गरेका छन् ।