२४ फागुन/अर्थ र व्यापार – आगामी नयाँ राष्ट्रपति निर्वाचनको तयारी पूरा भएको निर्वाचन आयोगले जनाएको छ ।
आगामी राष्ट्रपतिका लागि नेपाली कांग्रेसका रामचन्द्र पौडेल र नेकपा एमालेका सुवासचन्द्र नेम्वाङ उम्मेदवार छन् । आयोगका अनुसार भोलि बिहीबार बिहान १० बजेदेखि दिउँसो ३ बजेसम्मकालागि संघिय संसद भवनभित्र मतदानको समय तोकिएको छ ।

जसकालागि अहिले काठमाडौको बानेश्वरस्थित संघिय संसद भवन परिसरमा दुई वटा मतदान केन्द्र बनाइएको छ । सो स्थानमा संघीय संसदका लागि एउटा र प्रदेशसभा सदस्यहरुलाई अर्को मतदान केन्द्र बनाइएको हो ।
निर्वाचन अधिकृत महेश शर्माका अनुसार दिउँसो ३ बजेसम्म लाइनमा बसेका मतदाताहरुले मतदान गर्न पाउनेछन् ।
यस निर्वाचनको मतदान केन्द्रभित्र मोबाइल लैजान पाइने छैन । यदि कसैले मोबाइल लगे निर्वाचन कसूर हुने आयोगले जनाएको छ ।
निर्वाचन अधिकृत महेश शर्माले मतदानकार्य सकिएपछि साँझ ४ बजेबाट मत गणना सुरु गर्ने र साँझ ७ बजेभित्र मत परिणाम घोषणा गर्ने तयारी भएको जानकारि दिए ।