२१ भदौं/अर्थ र व्यापार – तनहुँको म्याग्दे गाउँपालिकाले अब हलगोरु पाल्ने कृषकलाई १० हजार रूपैयाँ अनुदान दिने भएको छ ।
पछिल्लोसमय गाउँपालिकामा हाते ट्र्याक्टरको प्रयोगले गोरु पालनलाई विस्थापित गर्दै लगेकाले आगामी दिनमा पुनः हरेक किसानको घरमा हलगोरु पाल्ने वातावरण बनाउन प्रति कृषक १० हजार अनुदानको व्यवस्था गरिएको सो गाउँपालिकाले जनाएको छ ।
गाउँपालिकाका प्रमुख प्रशासकीय अधिकृत नारायणप्रसाद अधिकारीले स्थानीय किसानलाई गोरुपालनमा प्रोत्साहन गर्न अनुदान दिने कार्यक्रम ल्याएको जानकारी दिए । जसका लागि गाउँपालिकाले हलगोरु पाल्ने किसानको तथ्यांक संकलन गर्ने योजना समेत बनाएको उनले जानकारि दिए ।
गाउँपालिकाका अध्यक्ष श्रीप्रसाद श्रेष्ठले यस गाउँपालिकाले किसानलाई आवश्यक पर्ने कृषि औजरका सामग्रीमा पनि ५० प्रतिशत अनुदान प्रदान गर्दै आएको जानकारी दिए ।
यसैगरी, गाउँपालिकाले दुग्ध उत्पादक किसानलाई प्रोत्साहन गर्न प्रतिलिटरमा १० रूपैयाँ अनुदान दिने निर्णय गरेको छ । दूधमा गाउँपालिकालाई आत्मनिर्भर बनाउनका अनुदान दिन लागेको जनाइएको छ । यसअघि गाउँपालिकाले प्रतिलिटर पाँच अनुदान दिँदै आएको थियो ।
सहकारी आबद्व भएका दुग्ध किसानको तथ्यांक संकलन गर्ने कार्यलाई पनि अघि बढाइएको अध्यक्ष श्रेष्ठले जानकारी दिए । गाउँपालिकाले सुत्केरी, गरिब र विपन्न परिवारलाई निःशुल्क एम्बुलेन्स सेवा दिने निर्णय गरेको छ । सेवा लिनका लागि सम्बन्धित वडाबाट सिफारिस गर्नुपर्ने प्रावधान रहेको जनाइएको छ ।