२६ असार/अर्थ र व्यापार – उच्च अदालत बार एशोसिएशन पाटनको २०औँ नयाँ कार्यसमितिको अध्यक्षमा शान्तिराम खतिवडा विजयी भएका छन् । उनले एकहजार ६६ मत ल्याएर विजयी भएका हुन् । उनका प्रतिस्पर्धी रामकृष्ण शर्माले जम्मा २७१ मत प्राप्त गरेका थिए ।
यसैगरि, एशोसिएशनका उपाध्यक्षमा रामचन्द्र न्यौपाने बिजयी भएका छन । उनले एकहजार २३ मत ल्याएर विजयी भएका हुन । उनको प्रतिस्पर्धी नारायण खरेलले २८४ मत प्राप्त गरेका थिए । यसैगरि, सचिवमा रवीन्द्रकुमार ढुंगााना, सहसचिवमा इन्दु कार्की र कोषाध्यक्षमा मिलन श्रेष्ठ विजयी भएका छन् ।
त्यस्तै १४ जना सदस्यहरुमा रमति महर्जन, भवानी भट्टराई, ईश्वरप्रसाद पुडासैनी, ओमप्रकाश चौधरी, श्याम रोक्का, धर्मराज पौडेल, राजाराम घिमिरे, लावण्यराज कार्की, धनजीत बस्नेत, शुलभ खनाल, सरिता आचार्य, रामकुमार खतिवडा, भावेश गौतम र सागर ढकाल विजयी भएका छन् ।
देशभरका ९० वटा बार एकाइमध्ये सबैभन्दा बढी सदस्य संख्या दुईहजार ८२८ मतदाता पाटन बारमा छन् । यस बारको निर्वाचनमा दुई समूह प्रतिस्पर्धामा उत्रिएका थिए । प्रजातान्त्रिक समूहको प्रतिनिधित्व शर्माले गरेका थिए भने प्रगतिशील समूह शान्तिराम खतिवडाले गरेका थिए । प्रगतिशील समूहमा नेकपा एमाले र नेकपा एकीकृत समाजवादी निकट कानुन व्यवसायी थिए ।
नयाँ कार्यसमितिमा पाँच पदाधिकारी र १४ सदस्य गरी १९ सदस्यीय नयाँ कार्यसमिति चयन भएको छ । शनिबार मतदान सम्पन्न भएर राति अबेर मतपरिणाम सार्वजनिक गरिएको थियो । यो नयाँ कार्यसमितिको समयावधि आगामी दुई वर्षको हुनेछ ।
तपाईको प्रतिक्रिया