४ फागुन /अर्थ र व्यापार – काठमाडौंको नयाँबानेश्वर क्षेत्रमा एमसीसीको विरोधमा प्रदर्शनमा उत्रिएकाहरु र प्रहरीबीच झडप भएको छ । अहिले बानेश्वर क्षेत्रमा तनावको स्थिति छ । एमसीसीको विरोधमा प्रदर्शनमा उत्रिएकाहरु र प्रहरीबीच भएको सो झडपमा वाईसीएल संयोजक सुमन देवकोटा घाइते भएका छन् ।

प्रहरीले केही प्रदर्शनकारीलाई नियन्त्रणमा लिएर भ्यानमा कोचेको छ । प्रदर्शनकारीलाई रोक्ने क्रममा प्रहरीले पानीको फोहोरा समेत प्रयोग गरेको छ । माओवादी केन्द्र, नेकपा एकीकृत समाजवादी, नेत्रविक्रम चन्द (विप्लव) नेतृत्वको नेकपा, मोहन वैद्य नेतृत्वको नेकपा क्रान्तिकारी माओवादी लगायत दलका कार्यकर्ताहरु बुधबार बिहानैदेखि बानेश्वर क्षेत्रमा भेला भएर एमसीसीको विरोधमा प्रदर्शन गरिरहेका छन् ।
अहिले राष्ट्रिय प्रजातन्त्र पार्टी (राप्रपा) को समूह पनि एमसीसीको विरोधमा मिसिएको छ ।

विरोध प्रदर्शनका कारण अहिले काठमाडौंको माइतीघर–तीनकुने सडक खण्डमा यातायात सेवा प्रभावित भएको छ । प्रधानमन्त्री शेरबहादुर देउवा र माओवादी केन्द्रका अध्यक्ष प्रचण्डबीच बुधबार बिहान भएको भेटवार्तामा पनि आजको संसद बैठकमा एमसीसी टेबल नगर्ने सहमति भएको छ ।
अब बिहीबार दिउँसो सत्ता गठबन्धनका नेताहरुको बैठक बसेर एमसीसीबारे निर्णय गर्ने बताइएको छ । एमसीसीको विरोधमा प्रदर्शनमा उत्रिएकाहरु र प्रहरीबीच झडप भएर स्थिती तनावपूर्ण भएपछि अहिले सभामुख अग्नि सापकोटाले पनि दलहरुबीच सहमति नजुटेको भन्दै सभामुखले एमसीसीलाई कार्यसूचीमा नराख्ने निर्णय सुनाएका छन्। 

बुधबार बिहानैदेखि अमेरिकी सहयोग परियोजना (एमसिसी) को विरोधमा काठमाडौं उपत्यकाका विभिन्न स्थानमा प्रदर्शन भइरहेका छन्। उनीहरूले विभिन्न नारा लगाउँदै प्रदर्शन गरिरहेका छन्। तीमध्ये बानेश्वरमा पनि प्रदर्शन भइरहेको छ। त्यसक्रममा प्रहरीले प्रदर्शनकारीमाथि पानीको फोहरा हानेको महानगरीय प्रहरी परिसर काठमाडौंका प्रहरी उपरीक्षक दिनेशराज मैनालीले जानकारी दिए।