१३ मंसिर/अर्थ र व्यापार– सरकारले अफ्रिकी मुलुकहरुबाट नेपाल आउनेहरुलाई नेपाल प्रवेशमा रोक लगाउने निर्णय गरेको छ । अफ्रिकी मुलुकहरुमा कोरोनाको अति छिटो संक्रमण फैलिने नयाँ भेरियन्ट ओमिक्रोन भाइरस देखा परेसँगै नेपाल सरकारले ती देशहरुबाट नेपाल आउने नागरिकलाई प्रवेशमा रोक लगाएको हो ।
गृहमन्त्रालयका सह सचिव तथा प्रवक्ता फणिन्द्रमणी पोखरेलले ती देशहरुबाट आउनेहरुलाई अनअराइभल भिसामा रोक लगाउने निर्णय भएको जानकारी दिए । पछिल्लो समय अफ्रिकी मुलुकहरुमा कोरोना भाइरसको नयाँ भेरियन्ट देखिएसँगै मालदिभ्सले विभिन्न ७ वटा अफ्रिकी देशबाट आउने यात्रुहरुलाई रोक लगाइसकेको छ । 
जसमा दक्षिण अफ्रिका, बोतस्वाना, जिम्वाबे, मोजाम्बिक, नामिबिया, लेसोथो, इसवाथिनीबाट आउने यात्रुहरुलाई रोक लगाएको हो । यसैगरि, छिमेकी मुलुक भारतले पनि यस्तो खतरनार्क नयाँ भेरियन्टबाट बच्न उच्च सतर्कता अपनाउने भनिसकेको छ ।
सोही संक्रमण फैलिन सक्ने त्रासका कारण अहिले  अन्य मुलुकहरुले पनि अफ्रिकी देशका यात्रुहरुलाई प्रवेशमा रोक लगाइसकेको छ । अफ्रिकी मुलुकहरुसँगको सम्पर्कमा रोक लगाइएपछि दक्षिण अफ्रिकाले इमान्दारितामा संजाए पाएको प्रतिक्रिया दिएको छ ।