४ साउन/अर्थ र व्यापार– नेपाल उद्योग परिसंघले अघि बढाएको ‘मेक इन नेपाल स्वदेशी अभियान’ लाई  सरकारले साथ दिने भएको छ।

अर्थमन्त्री जनार्दन शर्माले आत्मनिर्भर अर्थतन्त्र निर्माणका लागि नेपाल उद्योग परिसंघले अघि बढाएको ‘मेक इन नेपाल स्वदेशी अभियान’ को कार्यान्वयनमा सरकारले साथ दिने बताएका हुन् ।

आइतवार नेपाल उद्योग परिसंघको प्रतिनिधिमण्डलसँगको भेटमा अर्थमन्त्री शर्माले आत्मनिर्भर अर्थतन्त्र निर्माण आफ्नो पनि प्राथमिकता रहेको बताएका छन्। यसका लागि निजीक्षेत्रले अघि बढाएको अभियानलाई सरकारको साथ रहने बताए । 

अर्थमन्त्री शर्माले मुलुकमा औद्योगिक वातावरण सृजना गर्न, आर्थिक विकास, रोजगारी सृजना र आत्मनिर्भर अर्थतन्त्र निर्माणका लागि निजी क्षेत्रलाई सधैं साथमा लिएर अघि बढ्ने बताए ।  

मन्त्री शर्माले कोभिड–१९ महामारीले अर्थतन्त्रमा परेको प्रभाव न्यूनीकरण गर्न सरकार केन्दि«त रहेको निजी क्षेत्रबाट प्राप्त रचनात्मक सुझाव र सल्लाह लिएर अघि बढ्ने बताए । 

अर्थमन्त्री शर्मासंगको भेटमा परिसंघका अध्यक्ष सतिशकुमार मोरले सबै नेपाली नागरिकलाई खोप र आर्थिक पुनरोत्थान आजको प्रमुख आवश्यकता भएको बताए ।