२५ कात्तिक/अर्थ र व्यापार– मंगलवार नेपाली बजारमा सुनको मूल्य उल्लेख्य घटेको छ । मंगलबार प्रतितोला रू. ३ हजार ४०० ले घटेर रू. ९४ हजार ८०० पुगेको छ ।

नेपाल सुनचाँदी व्यवसायी महासंघका महासचिव धर्मसुन्दर बज्राचार्यल कोरोना बिरुद्धको खोप ९० प्रतिशतसम्म प्रभावकारी रहेको भन्ने सोमबारको अन्तर्राष्ट्रिय समाचारको प्रभाव सुन बजारमा परेकोे बताए । 

बज्राचार्यले कोरोनाका कारण लगानीका अन्य बजार प्रभावित हुँदा लगानीकर्ताहरु सुन बजार आएको र अब खोपको सुनिश्चिततासँगै सुनको लगानी प्रभावित बन्ने अवस्था देखिएको बताए । 

सोमवार छापावाला सुन प्रतितोला रू. ९८ हजार २०० मा कारोबार भएको थियो । यस्तै तेजाबी सुनको मूल्यसमेत प्रतितोला रू. ३ हजार ४०० ले घटेको छ । सोमवार प्रतितोला रू. ९७ हजार ७०० मा कारोबार भएको तेजाबी सुन मंगलवार रू.९४ हजार ३०० मा कारोबार भएको छ । 

यस्तै मंगलबार चाँदीको मुल्य पनि प्रतितोला रू.७० ले घटेर रू. १ हजार २१५ मा कारोबार भएको छ ।