१३ भदौ / अर्थ र व्यापार – सेयरबजारमा सूचिकृत कप्पनीमध्ये सबैभन्दा महङ्गो सेयरमूल्य भएको युनिलिभर नेपालमदसको अघिल्लो आर्थिक बर्षको तुलनामा गत आर्थिक बर्षमा खुद नाफामा कमी आएको छ । तर खुद नाफा घटेपनि कम्पनीले अघिल्लो बर्षको भन्दा धेरै लाभांश प्रस्ताव गरेको छ ।

कम्पनीले गत आर्थिक बर्षमा ९६ करोड ५२ लाख रुपैयाँ खुद नाफा कमाएको छ । जुन अघिल्लो आर्थिक बर्षको भन्दा साढे १५ करोड कम हो । अघिल्लो बर्ष बैंकले एक अर्ब १२ करोड नाफा कमाएको थियो । कम्पनीले लेखा परीक्षण भइसकेको वित्तीय विवरण सार्वजनिक गरेको हो ।

कम्पनीको विज्ञापन तथा प्रवद्र्धन, प्रशासनिक खर्च, उत्पादन खर्च बढेकाले खुद नाफामा असर परेको देखिएको छ । कम्पनीले केही महिना अघि राष्ट्रिय पत्रिकाहरुमा ज्याकेट विज्ञापन गरेर नाङ्गो साबुन बिरुद्ध विवादास्पद प्रचार युद्ध छेडेको थियो । त्यसैमा कम्पनीको धेरै खर्च बढेको देखिएको छ ।

अघिल्लो बर्ष २७ करोड विज्ञापनमा खर्च गरेको कम्पनीले गतवर्ष विज्ञापनमा ४१ करोड रुपैयाँ खर्च गरेको छ । गएको वर्ष मात्र कम्पनीले विज्ञापनमा मात्र १४ करोड बढी खर्च गरेको छ ।

युनिलिभरले वर्षभरीमा ४ अर्ब ४४ करोड रुपैयाँ खुद उत्पादन बिक्री गरेको छ भने दुई अर्ब २० करोड रुपैयाँ सामान उत्पादनमा खर्च गरेको छ । अघिल्लो वर्ष ३ अर्ब ९४ करोड रुपैयाँको उत्पादन बिक्री गरेको थियो । सामान उत्पादन बाहेक अन्य आम्दानीसमेत गर्दा कम्पनीको सञ्चालन आम्दानी पाँच अर्ब पुगेको छ । 

कम्पनीको प्रति सेयर आम्दानी ३३१ रुपैयाँ, प्रति सेयर नेटवर्थ २१ सय ५३ रुपैयाँ छ । अघिल्लो वर्ष युनिलिभरको प्रतिसेयर आम्दानी ४ सय ८२ रुपैयाँ थियो । भारतीय संयुक्त लगानीमा स्थापित कम्पनीले साबुन, सेम्पु, दन्तमन्जन, सौन्दर्य प्रशाधन लगायतका बस्तुहरु उत्पादन गर्ने गर्छ ।

युनिलिभरले गतबर्षको कमाईबाट ११ सय प्रतिशत अर्थात प्रतिकित्ता सेयर एक हजार एक सय रुपैयाँ नगद लाभांश वितरण गर्ने प्रस्ताव गरेको छ । साथै कम्पनीले आफ्नो २५ औ बार्षिकउत्सवको अवसरमा प्रतिकित्ता थप एक सय ७० रुपैयाँ विशेष लाभांश समेत वितरण गर्ने प्रस्ताव गरेको छ ।

अघिल्लो वर्ष कम्पनीले एक हजार २० प्रतिशत अर्थात प्रतिकित्ता सेयर बराबर एक हजार २० रुपैयाँ नगद लाभांश वितरण गरेको थियो । हाल यो कम्पनीको दोस्रो बजारमा प्रतिकित्ता सेयरमूल्य ३० हजार एक सय रुपैयाँ रहेको छ ।