२८ जेठ / अर्थ र व्यापार-पोखरामा असारको पहिलो हप्ता बङ्गुरको मासुको प्रवद्र्धनका लागि तेस्रो पोर्क फेस्टिबल गरिने भएको छ ।

पोखराको प्रदर्शनी केन्द्रमा ‘पोर्क सेतो स्वस्थ मासु’ भन्ने मूल नाराका साथ आगामी असार २, ३ र ४ गते फेस्टिबलको आयोजना गर्न लागिएको हो।

बङ्गुर व्यवसाय प्रवद्र्धन र बङ्गुरबाट बन्ने विभिन्न परिकारका स्वाद लिन पोर्क फेस्टिबलको आयोजना गर्न लागिएको हो ।

महोत्सवमा सेतो पोर्कको बजारीकरण, आहारा, खोर व्यवस्थापन, यान्त्रीकरणका बारेमा व्यावसायीलाई जानकारी गराइने छ ।

तीन दिनसम्म सञ्चालन हुने उक्त महोत्सवमा बङ्गुर उत्पादनका लागि ब्रिडर फार्म, उपकरण, दाना, औषधि, वित्तीय संस्था तथा प्राविधिक परामर्श, बधशाला तथा प्रशोधनसम्बन्धी स्टल समेत राखिने छ ।

सो महोत्सवमा बङ्गुरको मासुबाट बन्ने परिकारका २० वटा रेस्टुराँ रहने र विभिन्न जातजातिका नृत्य तथा झाँकी, लोक तथा दोहोरी गीत र सङ्गीत कार्यक्रमसमेत राखिएको छ ।