२९ असार / अर्थ र व्यापार – पूर्वप्रधानमन्त्री तथा नेकपा एमालेका अध्यक्ष केपी शर्मा ओलीले व्यवसायीलाई कामदारको सुरक्षा र मुलुकको आर्थिक समृद्धिमा लाग्न आग्रह गरेका छन् । यस्तो आग्रह बुधबार राजधानीमा सम्पन्न नेपाल वैदेशिक रोजगार व्यवसायी संघको आगामी शुक्रबार हुने २५औं साधारणसभा तथा निर्वाचनका लागि रोहन गुरुङ अध्यक्ष रहेको संयुक्त व्यावसायिक समूहका तर्फबाट आयोजित अन्तिम चुवानी सभामा पूर्वप्रधानमन्त्री तथा नेकपा एमालेका अध्यक्ष ओलीले व्यवसायीलाई गरेका हुन् ।

मुलुकको आर्थिक समृद्धिका लागि वैदेशिक रोजगार व्यवसायीको भूमिका एकदमै महत्वपूर्ण भएको भन्दै उनले व्यवसायीलाई सधैं कामदारको सुरक्षा र मुलुकको आर्थिक समृद्धिमा लाग्न आग्रह गरे । देशले यहाँका युवालाई बेरोजगार बनाएपछि ती बेरोजगारलाई सुरक्षित वैदेशिक रोजगारीको माध्यमबाट व्यवस्थापन गर्दै आएका वैदेशिक रोजगार व्यवसायीबाट मुलुकको आर्थिक विकासमा ठूलो भूमिका भएको बताउँदै उनले व्यवसायीलाई सत्यको पछि लाग्न आग्रह गरे ।

संघको आगामी नयाँ नेतृत्वका लागि गुरुङ समूहको तर्फबाट उम्मेदवारी दर्ता गराएका सम्पूर्ण व्यवसायीलाई भारी मतले विजय हुने सफलताको शुभकामना व्यक्त गर्दै उनले व्यवसायीलाई जस्तो पाए त्यस्तो ठाउँमा नेपाली महिला कामदार नपठाउन आग्रह गरे । उनले कुनै पनि रोजगारदाता श्रम गन्तव्य मुलुकमा महिला कामदार पठाउँदा राम्रोसँग बुझेर मात्र पठाउन व्यवसायीलाई सुझाव दिए । उनले लामो समय आन्तरिक द्वन्द्वमा फसेको रुवान्डालगायत मुलुकबाट पनि मुलुकको आर्थिक समृद्धिको पाठ सिक्न व्यवसायी र सम्बन्धित सरोकारवालालाई आग्रह गरे ।

अहिलेसम्म व्यवसायीले यहाँका बेरोजगार युवाहरूको श्रम व्यवस्थापनका लागि खेलेको भूमिका एकदमै अतुलनीय भएको भन्दै उनले व्यवसायीलाई एकजुट भएर अघि बढ्न सुझाव दिए । यस संघको २५औं वर्षगाँठ तथा रजत जयन्तीको अवसरमा आगामी निर्वाचनबाट विजयी हासिल गरेपछि सबै व्यवसायी एकजुट भएर अघि बढ्नुपर्ने धारणा राखे । अहिलेसम्म असंगठित रूपमा छरिएका बेरोजगार युवालाई संगठित एवं संस्थागत रूपमा विदेश पठाउने वैदेशिक रोजगार व्यवसायीलाई आफूले पठाएको कामदारले पठाउने रेमिट्यान्सको उचित सदुपयोग गर्ने वातावरण बनाउनसमेत आग्रह गरे । उनले कार्यक्रममा सहभागी व्यवसायीलाई मुलुकले खोजेको आर्थिक समृद्धिको पक्षमा प्रतिबद्ध यस व्यावसायिक समूहका उम्मेदवारलाई मत दिएर जिताउनसमेत आफ्नो पार्टीका तर्फबाट आग्रह गरे ।

नेकपा एमालेका सांसद तथा नेपाल वैदेशिक रोजगार व्यवसायी संघका संस्थापक अध्यक्ष महेन्द्र शेरचनले २०४८ सालमा आफ्नो नेतृत्वमा पहिलोपटक गठन भएको यस संघमा अहिले धेरै व्यवसायी सहभागी भएकोमा खुसी लागेको भन्दै व्यवसायीलाई थप मर्या्दित र एकजुट भएर अघि बढ्न सुझाव दिए । उनले म्यानपावर कम्पनी सञ्चालनका लागि सरकारलाई बुझाउनुपर्ने धरौटी रकमको दायरा बढाउँदैमा वैदेशिक रोजगारीका नाममा हुने ठगीका घटनामा खासै कमी नआउने बताए । अहिले संघमा भएका व्यवसायीले राम्रोसँग काम नगरेकै कारण वैदेशिक रोजगारीको क्षेत्रमा अनेक समस्या आइलागेको भन्दै उनले संघका व्यवसायीलाई  एकजुट भएर अघि बढ्न सुझाव दिए ।

सो कार्यक्रममा एमाले वैदेशिक रोजगार विभागका इन्चार्ज प्रकाश ज्वाला, नेकपा माओवादी केन्द्रका नेता तथा पूर्व श्रम तथा रोजगारमन्त्री लेखराज भट्ट, संघका पूर्वअध्यक्ष एलपी साँवा लिम्बूुलगायतले गुरुङ समूहबाट उम्मेदवारी दिएका व्यवसायीलाई बधाईको शुभकामना दिएका थिए । सोही कार्यक्रममा संघको आगामी नयाँ नेतृत्वका लागि अध्यक्षमा उम्मेदवारी दर्ता गराएका रोहन गुरुङले यस व्यवसायलाई थप मर्या्दित र व्यवस्थित बनाउन अहिलेसम्म संघको तर्फबाट भएका र गर्न बाँकी रहेका कार्यहरूको जानकारी गराउँदै हाल व्यवसायीले भोग्दै आएका नीतिगत समस्या समाधानका लागि पहल गरिदिन पूर्वप्रधानमन्त्री ओलीलगायतलाई आग्रह गरेका थिए ।

 यसैबीच, संघका वर्तमान अध्यक्ष विमल ढकाल समूहको तर्पबाट बुधबार राजधानीमा अर्को अन्तिम चुनावी सभा सम्पन्न गरेको थियो ।