२५ मंसिर / अर्थ र व्यापार - जलविद्युत क्षेत्र रुग्ण बन्दै गएपछि शेयरधनीहरू डुब्ने अवस्थामा पुगेको हाइड्रोपावरकै सञ्चालकहरू भन्न थालेका छन्।मंगलबार अपी पावर कम्पनीले माथिल्लो नौगड गाड आयोजना निर्माण सम्पन्न भएको उपलक्ष्यमा आयोजना गरेको कार्यक्रममा कम्पनीका अध्यक्ष गुरूप्रसाद न्यौपानेले जलविद्युत व्यवसाय मर्ने अवस्थामा आएको बताए। 

जलविद्युत कम्पनीहरूले धेर(थोर नाफा कमाइरहेको भए पनि बजार बिग्रिएको, बैंक ब्याजदर बढेको र आयोजनाको निर्माण लागत पनि बढेको भन्दै उनले दुखेसो व्यक्त गरे। कार्यक्रममा उनले कामदारको पारिश्रमिक तथा प्राविधिक सामानको लागत बढ्दा प्रोजेक्टहरू मारमा परेको बताए। ऊर्जा उद्योग धरासायी हुँदै गर्दा हाइड्रोले मात्रै पेट नभरिने हुँदा सँगसँगै अन्य आर्थिक उपार्जनका काम पनि गर्नुपर्ने उनले बताए।

‘अहिले सरकारले कृषिमा सहयोग गरिरहेको छ। अब हाइड्रोपावर र बाख्रापालन सँगै गर्नुपर्छ,’ उनले भने, ’हाइड्रोपावर र पर्यटन, फलफूल खेती सँगै गर्नुपर्छ।’ विद्युतको खपत बढाउनका लागि किसानहरूलाई विद्युतिय उपकरण वितरण गर्नुपर्ने उनको तर्क थियो। जलविद्युत आयोजनामात्रै निर्माण गर्दा लगानीकर्ता मारमा पर्ने हुँदा अन्य वैकल्पिक आय स्रोतहरू खोजिनु पर्ने भनाइ उनले राखे । 

कम्पनीले यसअघि २०७२ भदौमा नौगड गाड आयोजना ८.५ मेगावाट साना जलविद्युत आयोजनाको निर्माण सम्पन्न गरेको थियो। माथिल्लो नौगड गाडसहित कम्पनीले १६.५ मेगावाट क्षमताको विद्युत उत्पादन गरेको छ।