१० पुस /अर्थ र व्यापार - रुवाण्डामा लामो समयदेखि लगानीकर्ता विवाद झेलिरहेको चौधरी समूह समेत साझेदार रहेको होटल उबुम्वे अन्तत एक साझेदारले आफ्नो बनाएका छन् । सोमबार भएको लिलामीमा होटल ३ करोड ४० लाख ५३ हजार ८८८ डलरमा लिलामी भएको हो ।

तीन साझेदार रहेको होटल मुकवानो समूहका अलिखान कारमालीकै अर्को कम्पनीले लिलाम बढाबढमा सबैभन्दा बढी रकम तिर्दै आफ्नो बनाएको हो । किगालीस्थित होटलमै भएको लिलामीमा उमुबानो इन्डस्ट्रिजका तर्फबाट हसन गासानाले अन्य चार ले भन्दा बढी रकममा होटलको स्वामित्व कबुलेका थिए । उमुबानो इन्डस्ट्रिज पनि मुक्वानो समूहकै भएको स्रोतले जनाएको छ ।

होटलमा चौधरी ग्रुपको सिजी कर्प ग्लोबल, रुवगाण्डाको निजी क्षेत्रको उद्योग संघका अध्यक्ष रोबर्ट बाफाकुलेरा र मुक्वानो समूहका कारमालीको लगानी थियो । तीन साझेदार बीच होटललाई चौधरी समूहको जिंक ब्राण्डमा संचालन गर्ने सहमति भएपनि दुई साझेदारले सहमति तोड्दै होटललाई हिल्टन समूहको डबल ट्रि ब्राण्ड अन्तर्गत संचालन गर्न लागेको चौधरी समूहले आरोप लगाएको थियो ।

होटल संचालन हुनु अघि नै आपसी सहमति तोडिएको भन्दै सुरु भएको महिनौं लामो बिबादपछि साझेदारहरुले बैंकलाई तिर्न बाँकी १ करोड ८० लाख डलर केसिबी रुवाण्डा बैंकले लिलामी मार्फत असुल गरेको हो । लिलामीमा अन्य चार इच्छुक कम्पनीहरु पनि अन्तिमसम्म होटल आफ्नो बनाउन भिडेका थिए । तर मुक्वानो समूहले नै होटलको स्वामित्व हत्याउन सफल भएको छ । संचालन हुनु तीन महिना अघि नै तीन साझेदारबीच सुरु भएको विवादले होटल लिलामीको अवस्थामा पुगेको थियो ।  

साझेदारहरु बीच असमझदारी बढेपछि ऋण असुल्न कठिनाई हुने देखेर केसिबी रुवाण्डाले लिलामीबाट ऋण उठाइपाउँ भन्दै गत सेप्टेम्बरमा रुवाण्डा विकास बोर्डलाई पत्र लेखेको थियो । त्यसै अनुसार होटल लिलामी प्रक्रियामा गएको थियो ।