८पुस /अर्थ र व्यापार - ‘मारुती’ सिमेन्ट १२ बोरा विक्री गरे १ बोरा फ्री । ‘सप्तकोशी’ सिमेन्टको टार्गेट पुर्याए पाँच दिने थाईल्यान्ड भ्रमण । ‘बन्धन’ सिमेन्ट एक ट्रक विक्री गर्दा २–२ थान ब्ल्याङ्केट र हिटर सित्तैँमा ।

निर्माण क्षेत्रको बजारमा सिमेन्टको विक्रीमा मन्दी आएपछि सिमेन्टको मूल्य त घटेकै छ, विक्रेतालाई विभिन्न प्रकारका अफर पनि आइरहेका छन् । उद्योग सङ्गठन मोरङका उपाध्यक्ष प्रदीप मुरारकाका अनुसार यति बेला सरकारी खर्च तीव्र गतिले भएर विकास निर्माणका कामहरू धमाधम हुनुपर्ने हो तर स्थिति ठिक उल्टो छ । त्यसैले सिमेन्टको विक्रीमा मन्दी आएको हो ।
सप्तकोशी सिमेन्टका आशिष गोयलले अहिलेको बेला सधैँ मन्दी चल्ने भए पनि यस वर्षको विक्रीमा पहिलेका वर्षमा भन्दा ह्रास आएको बताए ।

गोयलका अनुसार विगतका वर्षमा असोजदेखि माघ महिनासम्म विक्रीमा बढीमा १५ प्रतिशतले ह्रास आउँथ्यो तर यस वर्ष २५ देखि ३० भन्दा बढी प्रतिशतले गिरावट छ । मारुती सिमेन्टका सञ्चालक नन्दकिशोर राठीले आफूले कारखाना मूल्य ८ सय ९० राखेर विक्री गरिरहेको सिमेन्टको मूल्य अहिले ८ सय ३० बनाएको जानकारी दिए ।उद्योगी राठीका अनुसार भारतमा क्लिङ्कर र कोइला दुबैमा मूल्य घटेको छैन तर नेपालको सिमेन्टको मूल्यमा भने प्रति दिन ह्रास आइरहेको छ । त्यसैले यसलाई राष्ट्रिय मन्दी नै मान्नु पर्छ ।

सिमेन्टको आवश्यकताभन्दा बढी उत्पादन भएको र सरकारी खर्च नभएका कारण मूल्यमा ह्रास आएको सर्वश्री अन्नपूर्ण सिमेन्टका राजेन्द्र राउतको भनाइ थियो । आफूले कारखाना मूल्य प्रति बोरा ८ सय ७५ मा विक्री गरिरहेको सिमेन्टको मूल्य अहिले ८ सय ५० कायम गरेको उल्लेख गर्दै उद्यमी राउतले यही स्थिति अझै ६ महिना भएमा सिमेन्ट उद्योगीको लगानी सङ्कटमा पर्ने दाबी गरे ।