१८ मंसिर/ अर्थ र व्यापार -  चौधरी समूहको सिजी फुड्सले भारतीय बजारमा प्राथमिक शेयर निष्काशन गर्ने भएको छ । सिजीले सन् २०२० मा साधारण शेयर जारी गर्नुका साथै तयारी चाउचाउ बाहेक अन्य दैनिक उपभोग्य वस्तुको उत्पादनसमेत थाल्ने भएको छ । 
भारतमा अहिलेको बार्षिक उत्पादन क्षमतालाई दोब्बर पार्दै सन् २०२० सम्ममा ५ लाख प्याकेट चाउचाउ बिक्री गर्ने कम्पनीको योजना छ । यो बाहेक सिजी कर्प ग्लोबलले सौन्दर्य प्रशाधन र लुगा धुने पाउडर (नयाँ ब्राण्ड) को साथै लोकप्रिय वाइवाइ ब्राण्डमा तयारी खाजा, अन्न लगायतको उत्पादनसमेत ल्याउने भएको छ ।  

चौधरी समूहका अध्यक्ष बिनोद चौधरीले भने ‘सन् २०२० मा हाम्रो सिजी फुड इण्डियाले प्राथमिक शेयर जारी गर्ने छ ।’ सिजी फुड इण्डियाको बार्षिक कारोबारको आकार १ हजार करोड भारु बराबर छ । अध्यक्ष चौधरीले भने ‘हामी युरोपेली कम्पनीसँगको सहकार्यमा पर्सनल केयरका उत्पादन लिएर सन् २०१९ मा बजार प्रवेश गर्नेछौँ । नेपालमा हामी पहिलेदेखि नै अत्यावश्यक वस्तु र खाद्यान्न उत्पादन गरिरहेका छौं ।’

गत साता मात्रै कजाकिस्तानमा चाउचाउ प्लान्ट खरिद गरेको सिजी कर्प ग्लोबलले बंगलादेशमा यसै महिनादेखि वाइवाइ चाउचाउ उत्पादन शुरु गर्दैछ । इजिप्टको राजधानी कायरो नजिकै साथै श्रीलंकामा समेत वाइवाइको प्लान्ट बिस्तार गरिन लागेको चौधरीले जानकारी दिए ।