३ पुस/ अर्थ र व्यापार  - त्रिभुवन अन्तराष्ट्रिय विमानस्थलमा २० वर्षदेखि ड्यूटी फ्री मदीरा विक्री गर्दै आएको ग्रीन लाइन र युनिभर्सल सप्लायरले भाडाबापत आठ करोड रुपैयाँ तिरेको छैन । विमानस्थलको अन्तराष्ट्रिय टर्मिनल भवनको आगमन तथा प्रस्थानतर्फ प्रमोद शम्शेर  जबराले संचालन गरेको युनिभर्सल सप्लाइ एजेन्सी र ग्रीनलाइन इन्टरनेशनल प्रा.लीले ताकेता गर्दा पनि पैसा नतिरेपछि सिल गरिएको छ ।

गत मंसिर २१ गते उक्त सटर खाली गराउनका लागि विमानस्थलले ताकेता गरेता पनि संचालक अझै सम्पर्कमा नआएको विमानस्थलले बताएको छ । विमानस्थलले यी आउटलेट गत जेठदेखि सिल गरिदिएको बिमानस्थलका महाप्रबन्धक राजकुमार क्षेत्रीले बताए ।

सरकारले नौ वर्षअघि विमानस्थलमा ड्यूटी फ्री प्रतिबन्ध लगाएपछि राणाले ड्यूटी पेड संचालनमा ल्याइरहेका थिए । तर भाडाबापतको शूल्क र विलम्ब शूल्क सहित आठ करोड रुपैयाँ बाँकी रहेको विमानस्थलका महाप्रबन्धक क्षेत्रीले जानकारी दिए ।
पटकपटक पत्राचार गर्दा समेत पैसा नतिर्ने लक्षण देखाएपछि पसल बन्द गरिएको थियो । उल्टै सर्वोच्चमा मुद्दा हाले पनि विमानस्थलले दुई चरणको मुद्धा जितिसकेको छ । अहिले हामीले तीन पुस्ते समावेश गरी पत्रिकामा पसलै जफत गर्ने सूचना निकाल्दा पनि सम्पर्कमा आएका छैनन् ।

फाइल बनाइसकेको र पसलभित्र रहेका सामान निकालेर एकठाउँमा सिल गरेर राख्नका लागि हामी छिट्टै मुचुल्का उठाउने योजनारहेको छ । सुरक्षा निकाय, अध्यागमन, भन्सार लगायत विभीन्न निकायका प्रतिनिधीको सहभागितामा सामान पन्छ्याउने योजनारहेको क्षेत्रीले बताए ।संचालकलाई बक्यौता तिराउनका लागि विमानस्थलले कानुनी रुपमा थप प्रक्रिया अघि बढाउने गृहकार्य सुरु गरिसकेको पनि क्षेत्रीले जानकारी दिए।