१८ वैशाख/अर्थ र व्यापार – प्रधानमन्त्री केपी शर्मा ओलीले नेपालमा लगानीका लागि एकदम उपयुक्त वातावरण रहेकाले ढुक्क भएर लगानी गर्न स्वदेशी र विदेशी लगानीकर्तालाई आग्रह गरेका छन् ।
बिहीबार कोशी प्रदेश सरकारद्वारा आयोजित कोशी लगानी सम्मेलनको उद्घाटन गर्दै प्रधानमन्त्री ओलीले लगानीकर्तालाई यस्तो आग्रह गरेका हुन् । उनले अनेक हिसाबले जुनसुकै क्षेत्रमा नेपालमा लगानीका निम्ति उपयुक्त वातावरण रहेकाले आन्तरिक र बाह्य लगानी परिचालनमा ध्यान दिन प्रशासनिक क्षेत्रलाई समेत आग्रह गरे ।
हाल मुलुकमा पूर्वाधार निर्माण भइसकेको समय भएकाले ढुक्कले लगानी गर्न सक्ने धारणा राख्दै उनले लगानीका लागि सरकारका तर्फबाट कुनै समस्या पर्न नदिने बताए । ‘कोशी प्रदेश पूर्वाधार विकास र सडक सञ्जालसँग जोडिएको छ , लगानी गरेर उत्पादन बजारमा लाने समयसम्म एसियालीस्तरको ६ लेनको पूर्व पश्चिम राजमार्ग हामी बनाइसक्छौँ , हामी कच्चा पदार्थ पनि ल्याउन सक्छौँ । त्यसकारण हरेक क्षेत्रमा नयाँ नयाँ सम्भावनालाई हामीले पहिल्याउन सक्छौं’ प्रधानमन्त्री ओलीले भने ।

अहिले देशमा सामान ल्याउन र लान कुनै हिसाबले नरोकिने र आफ्नो उत्पादनको बजार कोशी प्रदेशका विभिन्न कोरिडोर तथा नाकामा लान सक्ने गरी बाटो बनिसकेको जानकारी गराउँदै उनले विराटनगरसहित विभिन्न विमानस्थल विस्तार गरिनेछ बताए । सांस्कृतिक, धार्मिक र पर्यटकीय क्षेत्रका साथै सगरमाथासहित विभिन्न हिमाल र जडिबुटीहरुको थलो कोशीका जनता शिक्षित , मेहनती रहेको भन्दै उनले त्यसकारण पनि यहाँ लगानीको प्रचुर सम्भावना रहेको बताए ।
उद्यमशीलता दशक मनाउन सकिए रोजगारी दशक सफल हुने उल्लेख गर्दै प्रधानमन्त्री ओलीले भने, ’म युवालाई भन्न चाहान्छुु, जागिरको खोजीमा नभौँतारिनुस्, उद्यमशीलतामा लाग्नुस् । जसका लागि सोच, तालिम र सहयोगमा सरकारले साथ दिन्छ ।’

यसैगरी, प्रधानमन्त्री ओलीले विश्वको सर्वाेच्च शिखर सगरमाथालाई सगरमाथाकै नामबाट विश्वमा ब्राण्डिङ गर्न आग्रह गर्दै ‘माउन्ट एभरेष्ट’ भनिरहन नपर्नेमा जोड दिए । उनले अन्तर्राष्ट्रिय श्रम संगठन (आइएलओ) को मान्यताअनुसार श्रमको सम्मान दिन तथा रोजगारादाता र श्रमिकबीच संवादका साथै ट्रेड युनियन अधिकारको रक्षाका लागि नेपाल सरकार स्पष्ट रहेकोबारे लगानीकर्तालाई जानकारी गराए । सो कार्यक्रममा प्रधानमन्त्री ओलीलाई कोशी प्रदेशका मुख्यमन्त्री हिक्मतकुमार कार्कीसहितले स्वागत गरेका थिए ।