७ वैशाख/अर्थ र व्यापार – चालु आर्थिक वर्षको वितेका ९ महिनाको अवधीमा १ खर्ब ८८ अर्ब रुपैयाँको वस्तु तथा सेवा निर्यात भएको छ । भन्सार विभागले सार्वजनिक गरेको चालु आर्थिक वर्षको साउनदेखि चैत मसान्तसम्म ९ महिनाको अवधीमा भएको यो निर्यात अघिल्लो आर्थिक वर्षको सोही अवधिको तुलनामा ६५ प्रतिशतले बढेको छ ।

गत आवको चैतसम्ममा नेपालबाट भएको निर्यात १ अर्ब १३ अर्ब रुपैयाँको थियो । भन्सार विभागले सार्वजनिक गरेको तथ्यांकअनुसार नेपालको वैदेशिक व्यापार करिब १५ खर्ब रुपैयाँको भएको छ । यो व्यापार गत आवको सोही अवधिको तुलनामा भने १६.८९ प्रतिशतले बढेको देखिएको छ ।
गत आवमा १२ खर्ब ८१ अर्ब रुपैयाँको वैदेशिक व्यापार भएको थियो । नेपालमा पछिल्लो ९ महिनामा १३ खर्ब ३० अर्ब रुपैयाँको बस्तु आयात भएको छ । यस्तो आयात पछिल्लो ९ महिनामा ११ खर्ब ६७ अर्ब रुपैयाँको थियो ।
गत आर्थिक वर्षको तुलनामा चालु आवको चैतसम्ममा निर्यात १२ दशमलब ८१ प्रतिशतले बढेको भन्सार विभागले जनाएको छ । यो अवधिमा नेपालको व्यापार घाटा ११ खर्ब २१ अर्ब रुपैयाँ रहेको छ । यस्तो व्यापार घाटा पछिल्लो ९ महिनामा ६.४५ प्रतिशतले बढेको छ ।
अघिल्लो वर्ष यो अवधिमा नेपालको वैदेशिक व्यापार घाटा १२ खर्ब ८१ अर्ब रुपैयाँ थियो । यो अवधिमा नेपालमा सबैभन्दा बढी पेट्रोलियम पदार्थको आयात भएको छ । नेपालमा पछिल्लो ९ महिनामा सबैभन्दा धेरै आयात डिजेलको भएको छ । डिजेल ९१ अर्ब २६ करोड रुपैयाँको आयात भएको छ ।
भन्सार विभागका अनुसार समिक्षा अवधिमा पेट्रोल ४७ अर्ब ७७ करोड रुपैयाँको आयात भएको छ । ग्यास ४६ अर्ब ५८ करोड रुपैयाँको आयात भएको छ । चालु आवको वितेका ९ महिनामा २५ अर्ब रुपैयाँको स्मार्ट फोन आयात भएको छ ।
यसैगरी, चालु आवको वितेका ९ महिनाको अवधीमा १६ अर्ब ३ करोड रुपैयाँको सुन आयात भएको विभागको तथ्यांकले देखाएको छ । सुनको आयात गत आर्थिक वर्ष २०८०/८१ मा २ अर्ब ३६ करोड रुपैयाँको आएको थियो । अघिल्लो आर्थिक वर्ष २०७९/८० मा २ अर्ब २३ करोड रुपैयाँको सुन आयात भएको थियो ।
यसअघि सबैभन्दा धेरै आव २०७८/७९ मा ३५ अर्ब ६८ करोड रुपैयाँको सुन आयात भएको थियो । त्यसअघि कारोना विश्व महामारिको समय आव २०७७/७८ मा २७ अर्ब ३४ करोड रुपैयाँको सुन आयात भएको भन्सार विभागले जनाएको छ ।