२१ फागुन/अर्थ र व्यापार – नेपाल बिजनेस समिटको दोस्रो संस्करण आगामी ७ वैशाखमा काठमाडौंमा हुने भएको छ । नेपाल सरकार, उद्योग, वाणिज्य तथा आपूर्ति मन्त्रालय समेत आयोजक रहने सो सम्मेलनमा सहकार्य गर्न नेपाल चेम्बर अफ कमर्स र नेपाल बिजनेस इन्स्टिच्युट (एनबीआई) बीच सम्झैता भएको छ ।
समिट ‘इकोनोमी फर सस्टेनेबल एण्ड रेसिलेन्ट फ्युचर’ भन्ने नाराकासाथ आयोजना हुने भएको छ । यस पटकको सम्मेलनमा आर्थिक, बैंकिङ, उद्योग–व्यवसायिक तथा अधिक सम्भावना बोकेका क्षेत्रहरुमा देखिएका जल्दाबल्दा विषयहरुमा केन्द्रित रहेर सम्बन्धित क्षेत्रका स्वदेशी तथा विदेशी प्राज्ञ/विज्ञ, उदीयमान युवा तथा महिला उद्यमीहरुकाबीचमा छलफल र बहस गरिने जनाइएको छ ।
बहसका सत्रहरुबाट आउने उपयोगी सुझावहरु समावेश भएको निष्कर्ष प्रतिवेदनमा समावेश हुनेछन् । प्रतिवेदन कार्यान्वयनका लागि तीनै तहका सरकारहरुलाई हस्तान्तरण गर्ने उद्देश्य रहेको नेपाल चेम्बर अफ कमर्शले जनाएको छ ।
समझदारी पत्रमा हस्ताक्षर कार्यक्रममा नेपाल चेम्बरका अध्यक्ष कमलेश अग्रवालले निजी क्षेत्र उत्साहित बन्न नसकिरहेका बेला आयोजना हुन लागेको सम्मेलन फलदायी हुन सक्ने बताए । उनले सरकार र निजी क्षेत्रका बीचमा विश्वास कायम गर्दै आत्मनिर्भर अर्थतन्त्र निर्माणका लागि अगाडि बढ्ने वातावरण बन्ने सृजना गर्ने विश्वास व्यक्त गरे ।
यसैगरी, एनबीआईका कार्यकारी अध्यक्ष एवं सम्मेलन आयोजक कमिटी संयोजक विशाल गैरेले लगानी विस्तारका लागि सम्मेलन फलदायी हुने बताए । दुई ठूला अर्थतन्त्र भएका छिमेकी मुलुक चीन र भारत बीचको गतिशील साँघु बनाई आन्तरिक लगानीलाई प्रोत्साहन र बाह्य लगानीलाई आकर्षित गर्दै दिगो बैंकिङ विकासमार्फत औद्योगिकरण, कृषि, पर्यटन, जलविद्युत, वन पैदावार, प्रविधि, साना तथा मझौला उद्योगको स्तरोन्नति, स्वउद्यमशीलता तथा स्टार्टअप व्यवसाय, भेन्चर क्यापिटल, इक्युवेसन लगायतका क्षेत्रमा लगानी बढाएर आर्थिक विकासका लागि समिट प्रस्थान बिन्दु बन्ने उनको भनाइ छ ।
सो समिटमा संघीय सरकारका उच्च राजनीतिक एवं प्रशासनिक अधिकारी, प्रदेशका मुख्यमन्त्री, स्थानीय निकायका प्रमुख, स्वदेशी तथा विदेशी विषयविज्ञ, अर्थविद्, दातृ निकायका प्रतिनिधि सहभागी हुनेछन् ।
यस्तै, निजी क्षेत्रका अग्रणी संस्थाका नेतृत्व, बैंक तथा वित्तीय संस्थाका सञ्चालक तथा उच्च अधिकारी, उद्योगी एवं व्यवसायी, युवा, आईटी तथा डिजिटल प्रविधिमा संलग्न, वैदेशिक रोजगारबाट फर्केका जनशक्ति तथा उच्च शिक्षाका विद्यार्थीहरुको पनि सहभागिता रहने जनाइएको छ ।