५ माघ/अर्थ र व्यापार – चालु आर्थिक वर्षको वितेका ७ महिना साउनदेखि माघ मसान्तसम्मको अवधिमा वाणिज्य बैंकहरुले ५.६२ प्रतिशत कर्जा विस्तार गरेका छन् ।
आर्थिक गतिविधी बढेर माहोल राम्रो भएको बेला बैंकहरुको मुख्य बिजनेस नै कर्जा विस्तार हो । लगानीयोग्य रकम पर्याप्त रहेको यो बेला कर्जा विस्तार गर्न सफल भएका बैंकहरूको वित्तीय विवरणमा समेत सकारात्मक प्रभाव देखिन जानेछ ।
नेपाल बैंकर्स एसोसिएसनको तथ्यांकअनुसार असार मसान्तसम्म २० वाणिज्य बैंकहरूले कुल ४५ खर्ब ७० अर्ब ९१ करोड रुपैयाँ कर्जा प्रवाह गरेका थिए । तर, चालु आर्थिक वर्षको माघ मसान्तसम्म आउँदा २ खर्ब ५६ अर्ब ९४ करोड रुपैयाँले बढेको छ । माघ मसान्तसम्म कुल कर्जा रकम ४८ खर्ब २७ अर्ब ८५ करोड रुपैयाँ पुगेको छ ।
चालु आर्थिक वर्षको वितेका ७ महिनामा बैंकहरूमा संकलन भएको निक्षेपभन्दा कर्जा प्रवाह उच्च देखिन्छ । सोही अवधिमा निक्षेप संकलन जम्मा ४.२१ प्रतिशत मात्रै बढेको छ ।
असार मसान्तसम्म कुल निक्षेप संकलन ५७ खर्ब ५४ अर्ब ७७ करोड रहेकोमा माघ मसान्तसम्म आउँदा २ खर्ब ४२ अर्ब २८ करोड बढेको छ । माघ मसान्तसम्म कुल निक्षेप संकलन ५९ खर्ब ९७ अर्ब ५ करोड पुगेको छ । पछिल्लो समय कर्जा विस्तार बढ्न थालेको नेपाल बैंकर्स एसोसिएसनले जनाएको छ ।

नेपाल बैंकर्स एसोसिएसनका अध्यक्ष सन्तोष कोइरालाले बैंकमा कर्जाको माग पनि बढेको र सोही अनुसार प्रवाह पनि भइरहेको जानकारी दिए । आगामी एक वर्ष पर्याप्त कर्जा जाने संकेत देखिएको भन्दै उनले कर्जा प्रवाह बढेका कारण आन्तरिक अर्थतन्त्र पनि चलायन हुन खोजेको बताए ।
समिक्षा अवधीमा व्यापार बढाउने बैंकहरुमा ग्लोबल आइएमई बैंक सबैभन्दा अगाडि रहेको छ । यसैगरी, व्यापार गुमाउनेमा एनआईसी एसिया बैंक नै रहेको छ । बैंकर्स एसोसिएसनका अनुसार कर्जा विस्तारमा ग्लोबल आईएमई बैंक सबैभन्दा अगाडि देखिएको छ । ७ महिनाको अवधीमा ग्लोबल आइएमई बैंकले ४० अर्ब रुपैयाँ कर्जा बढाएको छ । धेरै कर्जा प्रवाह गर्नेमा पनि सोे बैंक पहिलो स्थानमा हरेको छ ।

माघ मसान्तसम्म बैंकको कर्जा प्रवाह ४ खर्ब ३१ अर्ब रुपैयाँ पुगेको छ । निक्षेप धेरै बढाउनेमा नेपाल इन्भेस्टमेन्ट मेगा बैंक अगाडि देखिएको छ । ७ महिनामै सो बैंकको निक्षेप संकलन ४० अर्ब बढेको छ । एनआईसी एसिया बैंकको भने निक्षेप र कर्जा दुवै उल्लेख्य घटेको छ । चालु आवको वितेका ७ महिना माघमसान्तसम्मको अवधीमा सो बैंकको निक्षेप ५८ अर्ब २२ करोड घटेको छ भने कर्जा प्रवाह ३२ अर्ब ८८ करोड घटेको छ ।