६ माघ/अर्थ र व्यापार– नेपाल निर्माण व्यवसायी महासंघले सरकारले आफ्ना जायज माग नसुनेको भन्दै सत्तारुढ दल नेपाली कांग्रेसका सभापति शेरबहादुर देउवालाई भेटेर विभिन्न १४ बुँदे ज्ञापनपत्र बुझाएको छ । महासंघको प्रतिनिधी टोलीले आइतबार देउवालाई भेटेर निर्माण व्यवसायीका समस्या समाधनकालागि पहल गरिदिन सो ज्ञापनपत्र बुझाएको हो ।
महासंघका अध्यक्ष रवि सिंहले सिमेन्ट र रड उद्योगीले हाल अत्यधिक मुल्यबृद्धि गरि कालोबजारी गरेको विषयमा सरकार जानकार रहेपनि मूल्य घटाउनका लागि कुनै पहल नगरेकाले बाध्य भएर काठमाडौको बुढानीलकण्ठस्थित निवासमै पुगेर देउवासँग भेटेर आफ्नो समस्याबारे अवगत गराएको बताए ।
उत्पादक एवं उद्योगीले सिमेन्टको भाउ वितेका ६ महिनाको अवधिमा विनाकारण सतप्रतिशत बढाएका छन् । अभाव सिर्जना गरेर भाउ बढाएको असर निर्माण क्षेत्रमा परेको व्यवसायीहरुको भनाइ छ ।
महासंघका अध्यक्ष सिंहले हाल नेपाली बजारमा सिमेन्ट , छड लगायत निर्माण सामग्रीमा जथाभावी मूल्यवृद्धि गरिएकाले यस्तो मुल्यबृद्धि धान्नै नसकिने गरी लागत बढ्न पुगेको बताए ।
पूर्व प्रधानमन्त्री एवं कांग्रेश सभापति देउवासामु निर्माण सम्पन्न भएका परियोजनाको भुक्तानी दिलाउन, सार्वजनिक खरिद नियमावलीको १३ औं संशोधनमा देखिएको म्याद थप सम्बन्धी कानूनी जटिलता हटाउन, साँवा ब्याज तिर्ने अवधि बढाइदिनका लागि पहल गर्न आग्रह गरेको महासंघले जनाएको छ ।
महासंघले आइतबार प्रेस विज्ञप्ति मार्फत यस्तो जानकारी गराएको हो । महासंघका अनुसार देउवाले निर्माण उद्योगीका जायज माग पूरा गर्न सक्दो पहल गर्ने आश्वासन दिएका छन् । महासंघले माग सम्बोधनका लागि सरकारलाई आगामी १५ माघसम्मको अल्टिमेटम दिएको छ । माग पूरा नभए आगामी १८ माघबाट चरणपद्ध आन्दोलन सहित व्यवसायी सडकमा उत्रिने महासंघको चेतावनी छ ।
आफ्ना माग सम्बोधन गर्नकालागि महासंघले पूर्व प्रधानमन्त्रि देउवा लगायत शीर्ष नेताहरुसँग हारगुहार माग्न थालेको छ । हाल सिमेन्ट, रड लगायत विभिन्न निर्माण सामग्रीमा अत्यधिक मुल्यबृद्धि गरि कालोबजारी गर्दै चर्को मूल्य वृद्धि भएको विषयमा सरकारले बेवास्था गरिदिएपछि अहिले निर्माण व्यवसायीहरुले विभिन्न राजनीतिक दलका शीर्ष नेताहरुसँग भेटेर हारगुहार माग्न थालेका हुन् ।