१८ मंसिर/अर्थ र व्यापार – तोकिएको सम्झौता अनुसारको काम नगरेपछि विभिन्न २१ वटा निर्माण कम्पनीहरुलाई सार्वजनिक खरिद अनुगमन कार्यालयले कालोसूचीमा राखेको छ । १५ वटा कम्पनी एक वर्षका लागि, दुई कम्पनी २/२ वर्षकालागि, २ कम्पनी अढाइवर्ष र एउटा/एउटा कम्पनी डेढवर्ष र तीन वर्षका लागि कालोसूचीमा परेका छन्।
तीन वर्षका लागि सार्वजनिक खरिदका गतिविधिमा सहभागी हुन नपाउनेगरि कालोसूचीमा पर्ने कम्पनीमा जोरपाटीको नव दुर्गा बिल्डर्स छ । शिवप्रसाद दंगाल सञ्चालक रहेको सो कम्पनीलाई कालोसूचीमा राख्न शंखरापुर नगरपालिकाको कार्यालयले सिफारिस गरेको हो।

सडक विभागको रुकुम पश्चिमको चौरजहारीस्थित संघीय सडक सुपरिवेक्षण तथा अनुगमन कार्यालयको सिफारिसमा सपना शैलुङ जेभी कालोसूचीमा परेको छ । यो जेभीमा हेटौंडाको सपना कन्स्ट्रक्सन र ललितपुर ढोलाहिटीको शैलुङ कन्स्ट्रक्सन रहेका छन् । २ वर्ष ६ महिनाका लागि कारबाहीमा परेका यी कम्पनीमा सपना हरिप्रसाद ढकालको हो भने पूर्व प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’को घरवेटी भनेर चिनिएका शैलुङ कन्स्टक्सन निर्माण व्यवसायी शारदाप्रसाद अधिकारीको हो ।

२ वर्षका लागि कारबाहीमा परेका कम्पनीमा रुकुम पश्चिम मुसीकोटको तेनिम मल्टीपर्पोज कम्पनी र बाँके कोहलपुरको केआर कन्स्ट्रक्सन छन् । केआर कन्स्ट्रक्सनलाई कालोसूचीमा राख्न नेपाल राष्ट्र बैंक बालुवाटारले लेखिपठाएको छ । यसैगरी, १ वर्ष ६ महिनाका लागि कालोसूचीमा पर्नेमा तनहुँ बन्दीपुरको खड्गदेवी कन्स्ट्रक्सन रहेको छ । सो निर्माण कम्पनीलाई तनहुँको भानु नगरपालिकाको सिफारिसमा सार्वजनिक खरिद अनुगमन कार्यालयले कारबाही गरेको हो ।

एक वर्षका लागि कालोसूचीमा परेकाहरुमा सुर्खेत वीरेन्द्रनगरको तप्त निर्माण सेवा, पूर्ण निर्माण सेवा, आइए कन्स्ट्रक्सन, बाँकेको हार्दिक कन्स्ट्रक्सन, जिसान ट्रेडर्स एण्ड अर्डर सप्लायर्स, सविना जनरल एण्ड अर्डर सप्लायर्स, हुम्लाको यास के शाही कन्स्ट्रक्सन, एसके निर्माण सेवा, काभ्रेको ट्राभलर्स क्रियु कन्स्ट्रक्सन, खोटाङको युनिक निर्माण सेवा रहेका छन् ।
यसैगरी, एक वर्षकै कार्बाहीमा परेकाहरुमा काठमाडौं कालिकास्थानको युनिभर्सल ट्रेड एण्ड टेक्नोलोजी प्रालि, जीसी कन्स्ट्रक्सन कास्की, महिमा कन्स्ट्रक्सन बर्दिया र जायसवाल कन्स्ट्रक्सन धनुषा रहेका छन् ।