१४ असोज/अर्थ र व्यापार – उद्योग, वाणिज्य तथा आपूर्तिमन्त्री दामोदर भण्डारीले विपद्जन्य अवस्थाको फाइदा उठाउँदै पर्वको मुखमा महंगी, कालोबजारी र कृत्रिम अभाव सिर्जना हुनसक्नेतर्फ सचेतभई प्रभावकारीरुपमा बजार अनुगमन गर्न निर्देशन दिएका छन्।
उनले वाणिज्य, आपूर्ति तथा उपभोक्ता संरक्षण विभागका महानिर्देशक राजन पौडेललाई मन्त्रालयमा बोलाएर महँगी र कालोबजारीविरुद्ध निर्ममरुपमा प्रस्तुत हुन निर्देशन दिएका हुन्।
‘बजारबाट हामीलाई विभिन्न माध्यमबाट महँगी, कालोबजारी र कृत्रिम अभावसम्बन्धी जानकारी प्राप्त भइरहन्छ । विभागले अनुगमनलाई तीव्रता दिनुपर्छ,’ मन्त्री भण्डारीले महानिर्देशक पौडेललाई भने ।
उनले अनुगमनका लागि मन्त्रालयले आवश्यक सहयोग गर्ने आश्वासन दिए। मन्त्री भण्डारीले खाद्य व्यवस्था तथा व्यापार कम्पनीका प्रमुख कार्यकारी अधिकृत रमेश आचार्य र साल्ट ट्रेडिङ कर्पोरेसनका प्रमुख कार्यकारी अधिकृत उर्मिला श्रेष्ठलाई अत्यावश्यक दैनिक उपभोग्य सामानको मौज्दात बढाउन निर्देशन दिएको उनको सचिवालयले जनाएको छ।
मन्त्री भण्डारीले नेपाल आयल निगमका कार्यकारी निर्देशक चण्डिकाप्रसाद भट्टलाई एलपी ग्यासको आवश्यक मौज्दात बढाउन निर्देशन दिए ।