४ असोज/अर्थ र व्यापार – नेपाल उद्योग वाणिज्य महासंघका अध्यक्ष चन्द्रप्रसाद ढकालले महासंघकै सक्रियता र निरन्तर लगावका कारण मुलुकको अर्थतन्त्रमा सकारात्मक आशा जागेको बताएका छन्।
ललितपुर उद्योग वाणिज्य संघको ४५औं वार्षिक साधारण सभालाई सम्बोधन गर्दै ढकालले भने, ‘कोभिड–१९ महामारी र रसिया–युक्रेन युद्धपछि विश्वका अन्य देशहरुजस्तै नेपालको अर्थतन्त्र पनि के कसो हुने हो भन्ने त्रास सबैमा थियो । त्यति नै बेला यहाँ श्रीलंकाको जस्तै अवस्था हुने हल्ला फैलाइयो। नेतृत्वमा आएपछि करिब डेढ वर्ष हामीले यसरी काम ग¥यौं कि अहिले आशा जागेको अवस्था छ । अर्थतन्त्रमा सुधारका संकत देखिएका छन्।’
उनले महासंघले आम मानिसमा देखिएको निराशाको अवस्था चिर्न सरकारसँगको सहकार्य थालनी गरेको, अर्थतन्त्रलाई थप बिग्रन नदिन र कोभिड–१९पछि त्यसअघिकै अवस्थामा पुनःस्थापना गर्न सुधारका कामको सुरुवात गरेर सरकारलाई दबाब दिएकाले अहिले सकारात्मक परिणाम देखिएको दाबी थियो।
उनले महासंघकै कारण नेपाल सरकारले गरेको पछिल्लो लगानी सम्मेलन पहिलेको भन्दा फरक रहेको बताए ।

‘पहिले दाताले प्रतिबद्धता गरेबमोजिमको लगानी आएन। किन आएन भनेर यसपटक हामीले त्यसको कारण खोज्यौँ। कतिपय कानुनहरु बाधक देखिए र तिनको संशोधनका लागि हामीले पहल ग¥यौं। सरकारलाई दबाब पनि दियौं। हाम्रो सहभागितामा एक कार्यदल बन्यो र लगानी सम्मेलनको मुखैमा आठ वटा कानुन संशोधन भए। हामीलाई लाग्छ अब दातालाई प्रतिबद्धता अनुसार लगानी ल्याउन सहज हुनेछ।’
उनले कानुन संशोधनका क्रममा राजनीतिक पार्टीहरु आर्थिक मुद्दामा एकमत देखिनु सकारात्मक रहेको बताए । उनले देशले वैदेशिक लगानी मात्र नहेरेर देशभित्रै छरिएर रहेको पुँजीलाई एकत्रितगरी ठूला लगानीमा लगाउनसक्ने बताएका छन्।
उनले यस्तै पुँजीलाई बटुलेर राष्ट्रियस्तरको लगानीमा लगाउन सकियोस् भन्ने उद्देश्यले निजी क्षेत्रले सबैको सहभागितामा १० अर्बको नेपाल डेभलपमेन्ट पब्लिक लिमिटेड कम्पनी स्थापना भइसकेको जानकारी दिएका थिए ।
देशमा लगानीको वातावरण निर्माण गर्न र खस्कँदो अवस्थामा रहेको अर्थतन्त्रमा सुधार ल्याउन महासंघले धेरै काम गरेको उदाहरण पेस गर्दै उनले यो समय लगानीका लागि उचित समय भएकाले लगानी गरी लाभ लिन सबैलाई आग्रह गरे ।