११ भदौ/अर्थ र व्यापार – उपप्रधान एवं अर्थमन्त्री विष्णुप्रसाद पौडेलले असल व्यावासायी बनेर काम गरे सहयोग गर्ने बताएका छन् । नाडा अटो शोको उद्घाटन समारोहमा उनले अफ्ठ्यारो भने सरकार व्यासायीको साथमा रहेको बताएका हुन्।
नाडा अध्यक्ष करण चौधरीले सरकारबाट नीतिगत योजना माग्दै त्रासको वातावरण नभएमात्रै काम गर्न सक्ने बताएका थिए। यस्तै, अन्य व्यवसायीले पनि सुरक्षाको प्रत्याभूति खोजेका थिए। उद्योगीले त्रासमुक्त वातावरण माग्दा अर्थमन्त्रीले भने, ‘ धेरै साथीहरुले व्यवसायीहरुले राज्यले दुःख दियो भन्नू भयो। तपाईंहरु असल व्यवसायी भएर काम गर्नुस सरकारले सहयोग गर्छ। केही अफ्ठ्यारो परे भन्नुस।’
अर्थमन्त्री पौडेलले आफूलाई काम गर्ने की भाषण गर्दै हिँड्ने भन्ने विषयमा नै अन्यौल रहेको बताउँदै अनौपचारिक कार्यक्रममा नबोलाउन भने।
‘बोलाउनु भन्दा काम गर्नुस भने राम्रो हुने हो। नाडा अटो सोलाई शुभकामना दिन चाहन्छु,’ उनले भने। उनले व्यवासायीले उठाएको नीतिगत स्थिरताको मागलाई सरकारले सम्बोधन गर्ने समेत बताए।
‘नीतिगत स्थिरता कायम गर्न सरकार लागि परेको छ । यो अटो क्षेत्र सबैको हो। तपाईंहरु ट्रेडिङ हुदै उद्योग जाने कुरा राम्रो छ,’ उनले भने। भूगोलमा हिसाबले नेपाल सानो भए पनि गुणस्तरीय काम गर्न पौडेलले अटो व्यवसायीलाई आह्वान गर्दै भने, ‘अटो क्षेत्र अन्तर्राष्ट्रिय बजार जान सक्छ।’ उनले अटो क्षेत्र मात्र नभएर अर्थतन्त्रका सबै क्षेत्रमा परिमार्जन गर्दै जाने सोच सरकारको रहेको बताए ।
मौद्रिक नीति सबै क्षेत्रले भने जस्तो नभए पनि अर्थतन्त्र चलायमान बनाउन गरि ल्याएका छौं भन्दै उनले नडा अटो क्षेत्रले राजस्वमा ठुलो योगदान दिएको बताए । उनले पूर्वाधार निर्माणलाई पनि समयमै सन्पन्न गर्ने गरि सरकार अघि बढेको बताए।
कार्यक्रममा नाडाका अध्यक्ष करण चौधरीले पौडेलसामु अटोमोबाइल पारदर्शी बिजनेस भएको र छलकपट नगरेको बताएका थिए । सो अवसरमा उनले व्यवसायीलाई त्रासबाट मुक्त दिलाएमात्रै व्यवसायीले काम गर्न सक्ने अर्थमन्त्रीलाई भनेका थिए।
‘ट्रेडिङबाट सुरु भएको अटो क्षेत्र इन्डस्ट्रीमा परिणत भएको छ । नेपालमा धेरै पार्ट्सहरु देखि गाडीहरु नै उत्पादन हुने माहोल बनेको छ । तर यसरी व्यवसायीले गरेको लगानीमा सरकारको नीतिले समस्या पार्ने गरेको छ,’ उनले भने। एक खर्ब लगानी गरेको अटो व्यवासायीलाई सरकारले नै सहयोग गर्न नसकेको उनको भनाइ छ।
‘औसतमा अटो क्षेत्रले राजश्वमा २० प्रतिशत योगदान गरेको छ । अहिलेको सरकार माथि ठुलो आशा छ । सरकारले स्थिर नीति बनाउनेतर्फ लाग्छ भन्ने हाम्रो विश्वस छ,’ चौधरीले भने, ‘सरकारले अटो क्षेत्रलाई प्राथमिकतामा राखोस । हामी डाउनग्रेडमा जानु नपरोस्।’