१६ चैत/अर्थ र व्यापार – सरकारले चैते धानको समर्थन मूल्य तोकेको छ । बिहीबार बसेको मन्त्रिपरिषद्को बैठकले चालु आर्थिक वर्ष २०८०/८१ का लागि १८ प्रतिशतसम्म चिस्यान भएको चैते धानको समर्थन मूल्य प्रतिक्विन्टल २ हजार ७ सय ७ रुपैयाँ २८ पैसा तोकेको हो ।
यसैगरी, १८ प्रतिशत भन्दा बढी चिस्यान भएको चैते धानको हकमा १ प्रतिशत चिस्यानका लागि प्रतिक्विन्टल १२ सय ग्रामका दरले हुन आउने तौल घटाइ कायम हुने तौलका आधारमा न्यूनतम समर्थन मूल्य कायम हुने निणर्य सरकारले गरेको छ । यसअघि बेलैमा सरकारले धानको समर्थन मुल्य नतोकिदिने गरेका कारण धान उत्पादक कृषक मर्कामा पर्दै आएका थिए ।
समयमा धानको मुल्य नतोकिएपछि बजारमा निजी व्यापारीले आफुखुसी धानको खरिद मुल्य राखेर किसानलाई झुक्याउँदै आएका थिए । सरकारले नै यसरी धानको समर्थन मुल्य तोकिदिएपछि धान उत्पादक किसानलाई तोकिएको मुल्य पाउन केही राहत मिल्ने छ । सोही कारण सरकारले बिहीबार धानको समर्थन मुल्य निर्धारण गरिदिएको हो ।