२५ फागुन/अर्थ र व्यापार – बैंक, वित्तीय संस्थाविरुद्धका अराजक गतिविधि रोक्न नेपाल बैंकर्स संघका प्रतिनिधि एवं बैंकर्सहरूले नवनियुक्त अर्थमन्त्री वर्षमान पुनसँग माग गरेका छन् ।उनीहरूले अर्थमन्त्री पुनलाई कार्यकक्षमै भेटेर बैंकको ऋण तिर्नु पर्दैन भन्नेहरूलाई तत्काल कारबाही गर्न माग गरेका हुन । संघका अध्यक्ष सुनील केसीलगायतले बैंकिङ क्षेत्रको सुरक्षामा गम्भीर हुनसमेत सरकारको ध्यानाकर्षण गराए ।
ऋण उठाउन गएका बैंकका कर्मचारीमाथि अपमानजनक व्यवहारका साथै भौतिक आक्रमणका घटना बढेकामा गम्भीर हुन उनीहरूले अर्थमन्त्री पुनलाई आग्रह गरे । बैंकर्सहरुको यस्तो आग्रहमा अर्थमन्त्री पुनले बैंक, वित्तीय संस्थाबाट लिएको ऋण नतिर्न अभियान सञ्चालन गर्ने प्रवृत्तिलाई सरकारले छूट नदिने स्पष्ट पारे ।
उनले जनताको निक्षेपबाट लिइएको बैंकको ऋण तिर्दिन भन्ने र तिर्नु हुन्न भन्ने प्रवृत्तिलाई सरकारले कडाइका साथ नियन्त्रण गर्ने बताए । बिहीवार बिहान बसेको मन्त्रिपरिषद् बैठकमा प्रधानमन्त्री पुष्पकमल दाहालले बैंकको ऋण नतिर्न भड्काउँदै हिँड्नेहरूलाई नियन्त्रणमा लिएर कारबाही गर्न सम्बद्ध मन्त्रालय र निकायलाई निर्देशन दिएको जानकारी गराउँदै मन्त्री पुनले भने, ‘बैंक, वित्तीय संस्थाबाट लिएको ऋण तिर्दिन भन्ने र तिर्नु हुन्न भनेर अभियान चलाउने प्रवृत्तिलाई अब धेरै दिन छूट दिन सकिँदैन,’ मन्त्री पुनले भने, ‘त्यो प्रवृत्तिलाई प्रोत्साहित गर्ने काम कसैले पनि गर्नु हुँदैन ।’
निजीक्षेत्रको मनोबल घटाउने प्रवृत्तिले अर्थतन्त्र र मुलुकको समग्र समृद्धि यात्रालाई अवरुद्ध पार्ने भएकाले सरकारले लगानीकर्ताको मनोबल गिर्न नदिने अर्थमन्त्री पुनले बताए । मुलुकमा लगानीको वातावरण र लगानी सुरक्षाको ग्यारेन्टी गर्न सकिए मात्र बाह्य लगानी आकर्षित गर्न सकिनेमा सरकार स्पष्ट रहेको उनको भनाइ थियो ।
‘सरकारले लगानीको वातावरण बनाउँछ । सुरक्षाको प्रत्याभूति दिलाउँछ,’ अर्थमन्त्री पुनले भने, ‘निजीक्षेत्र आत्तिने र डराउने वातावरणको सरकारले अन्त्य गर्छ ।’ सरकारले नागरिकको व्यक्तिगत, पारिवारिक र सम्पत्तिको सुरक्षा दिने प्रतिबद्धता उनको थियो ।
उनले निजीक्षेत्रका व्यवसायीलाई गल्ती नगरी काम गर्न, अनावश्यक दुःख नदिन नियामक निकायलाई आग्रह गरे । यसैगरी,उनले सत्तारूढ गठबन्धनमा भएको परिवर्तनका कारण पूर्वनिर्धारित लगानी सम्मेलन प्रभावित नहुने दावी गरे ।