४ फागुन/अर्थ र व्यापार – नेपाल उद्योग परिसंघले नेपालका लागि चिनियाँ राजदूत छन् सोङसँग नेपालमा लगानीकर्ता भित्राउन आग्रह गरेको छ।
परिसंघका अध्यक्ष राजेशकुमार अग्रवालले राजदूत सोङलाई सीएनआईमा बोलाएर छलफल गरी पर्यटन, सूचना प्रविधि, जलविद्युत, कृषि, भौतिक पूर्वाधारलगायत क्षेत्रमा चिनियाँ लगानी तथा प्रविधि आकर्षित गर्नका लागि पहल गरिदिन आग्रह गरेका हुन्।
उनले सरकारले आगामी वैशाखमा गर्न लागेको लगानी सम्मेलनमा चिनियाँ लगानीकर्ताको समूह ल्याउनका लागि भूमिका निर्वाह गर्न पनि आग्रह गरेको परिसंघद्धारा जारी प्रेस विज्ञप्तिमा उल्लेख छ ।
अध्यक्ष अग्रवालले चीनले पोखरा र गौतमबुद्ध अन्तर्राष्ट्रिय विमानस्थलमा सिधा उडान गरी नेपालको पर्यटन प्रवर्धनमा सहयोग गर्नुपर्ने पनि बताए। पोखरा विमानस्थल संचालनमा आएको एक वर्ष नाघिसक्दा पनि एउटै नियमित उडान भएको छैन। यो विमानस्थल चीनको ऋण सहयोगमा बनाइएको हो। यस्तै भैरहवामा पनि सातामा एउटाभन्दा उडान हुन सकेको छैन।
नेपालकालागि चिनियाँ राजदूत सोङले चीनले नेपाललाई उच्च प्राथमिकतामा राखेको तर तत्काल धेरै क्षेत्रमा लगानी गर्न नसक्ने जवाफ दिए। उनले उच्च सम्भावना भएका निश्चित क्षेत्र पहिचान गरी ती क्षेत्रमा उत्पादन वृद्धिका लागि सहयोग गर्ने प्रतिबद्धता जनाए ।
सो छलफलमा परिसंघका पूर्वअध्यक्ष हरिभक्त शर्मा, उपाध्यक्ष निर्वाण चौधरी लगायतका व्यवसायी सहभागी भएका थिए।