१२ माघ/अर्थ र व्यापार – निर्जीवन बीमा कम्पनीको व्यवसायमा गिरावट आएको छ। नेपाल बीमा प्राधिकरणका अनुसार चालु आर्थिक वर्षको पुससम्म कम्पनीहरुको व्यवसाय ३.१९ प्रतिशतले घटेको छ ।
१४ वटा बीमा कम्पनीहरुले दोस्रो त्रैमासम्म १९ अर्ब ४४ करोड रुपैयाँ कुल बीमा शुल्क संकलन गरेका छन्। पोहोरको तुलनामा यो ६४ करोड रुपैयाँले कम हो। पोहोर दोस्रो त्रैमाससम्म कम्पनीहरुले २० अर्ब रुपैयाँ बराबरको व्यवसाय गरेका थिए ।
आर्थिक गतिविधि खुम्चिएका कारण बीमा कम्पनीहरुले यो आर्थिक वर्ष सुरुदेखि नै व्यवसाय बढाउन सकेका छैनन्। व्यवसायमा सर्वाधिक गिरावट आउनेमा राष्ट्रिय बीमा कम्पनी छ। यस कम्पनीको व्यवसाय ५०.७५ प्रतिशतले घटेको छ ।
सो कम्पनीले चालु वर्ष पुससम्म ६९ करोड ३४ लाख रुपैयाँ बीमा शुल्क संकलन गरेको छ। पोहोर यही अवधिमा उसले १ अर्ब ४० करोड रुपैयाँको व्यवसाय गरेको थियो।
१४ मध्ये ६ कम्पनीको व्यवसाय खुम्चिंदा सिद्धार्थ प्रिमियर इन्स्योरेन्सको बीमा शुल्क संकलन १८.३२ प्रतिशतले घटेको छ। यो कम्पनीले यो वर्ष ६ महिनामा १ अर्ब ९७ करोड २६ लाख रुपैयाँ बीमा शुल्क आर्जन गरेको छ।
निर्जीवन बीमा व्यवसायमा सर्वाधिक बजार हिस्सा शिखर इन्स्योरेन्सको छ। उसले ६ महिनामा २ अर्ब ४५ करोड ८ लाख रुपैयाँको व्यवसाय गरेको छ। पोहोर ६ महिनाको तुलनामा यो रकम ७.६० प्रतिशतले कम हो।
व्यवसाय बिस्तार गर्ने ८ कम्पनीमध्ये दि ओरियन्ट इन्स्योरेन्स सबैभन्दा अगाडि छ। यो कम्पनीले ६ महिनामा पोहोरको तुलनामा ३३.३१ प्रतिशतले व्यवसाय विस्तार गरेको छ। उसले पुससम्म ९३ करोड ५१ लाख रुपैयाँ प्रिमियम आर्जन गरेको छ। व्यवसाय गर्ने अनुमति पाएका चार निर्जीवन लघुबीमा कम्पनीमध्ये तीन वटाले ६ महिनामा ४ करोड ५० लाख रुपैयाँ प्रिमियम संकलन गरेका छन्।
प्राधिकरणका अनुसार नेपाल माइक्रो इन्स्योरेन्सले २ करोड ३७ लाख, प्रोटेक्टिभ माइक्रोले १ करोड ६५ लाख र स्टार माइक्रो इन्स्योरेन्सले ४७ लाख रुपैयाँको व्यवसाय गरेका हुन्।