११ असोज/अर्थ र व्यापार – काठमाडौको भृकुटीमण्डपस्थित प्रदर्शनी हलमा फर्निचर प्रदर्शनी तथा मेला (फर्निचर एन्ड फर्निसिङ एक्स्पो) सुरु भएको छ । नेपाल फर्निचर तथा फर्निसिङ संघले आयोजना गरेको नवौँ संस्करणको सो एक्स्पोको उद्घाटन उद्योग, वाणिज्य तथा आपूर्तिमन्त्री रमेश रिजालले गरेका हुन् ।
बुधबारदेखि सुरु भएको पाँचदिने एक्स्पो आगामी १५ असोजसम्म चल्ने छ । एक्स्पो उद्घाटन गर्दै मन्त्री रिजालले यस व्यवसायमा भएको लगानी तथा सिर्जना गरेको रोजगारी र सरकारको राजस्वमा पु¥याएको योगदान महत्वपूर्ण रहेको बताए । तर अहिले पनि फर्निचर क्षेत्रको आधा भन्दा बढी माग आयातित सामग्रीबाट आपूर्ति गर्नुपरेको भन्दै उनले यो अवस्थालाई परिवर्तन गर्नु आवश्यक रहेको बताए ।
‘सरकारले आन्तरिक उत्पादन बढाउने, आयात घटाउने र निर्यात प्रवद्र्धन गर्ने नीतिलाई प्राथमिकता दिँदै आएको बताउँदै मन्त्री रिजालले भने, ‘हाम्रो मौलिक कला संस्कृति झल्किने र स्थानीय कच्चा पदार्थमा आधारित हस्तकलाका सामानको निर्यात प्रवद्र्धनमा जोड दिनुपर्छ । ’
उनले देशभित्रै प्रसस्त सम्भावना र स्रोत हुँदाहुँदै पनि विभिन्न खालका काठ र काठजन्य सामग्री बाहिरबाट आयात हुनु मुलुकको अर्थतन्त्रका लागि राम्रो नभएको बताए ।
नेपालको फर्निचर तथा फर्निसिङ बजारको उत्थान गर्दै स्वदेशमै उत्पादित वस्तु तथा सेवालाई एउटै छानामुनि प्रदर्शनीमा ल्याउने उद्देश्यका साथ आयोजना गरिएको प्रदर्शनी निकै उपलब्धीमुलक र फलदायी हुने अपेक्षा गरिएको आयोजक संस्था संघले जनाएको छ ।
यस एक्स्पोमा फर्निचर तथा फर्निसिङ सामग्री बिक्रेता, उत्पादक, आयातकर्ता, वितरक, मेसिनरी तथा प्रविधि हस्तान्तरण, डिलर व्यवसायीलगायत सयभन्दा बढी स्टल प्रदर्शनीमा राखिएका छन् । नेपालमा उत्पादित फर्निचर सामग्रीलाई प्रवद्र्धन तथा बजारीकरण गर्नु प्रदर्शनीको मुख्य उद्देश्य रहेको संघले जनाएको छ ।
एक्स्पोको आयोजक संस्था नेपाल फर्निचर तथा फर्निसिङ संघका अध्यक्ष दिनेश कुमार अग्रवालले अर्थतन्त्रमा महत्वपुर्ण योगदान पु¥याउँदै आएको फर्निचर तथा फर्निसिङ उद्योग र व्यवसायलाई सरकारले संरक्षण गर्न नसकेको बताए । उनले वर्षौ पहिले तर्जुमा भएका कानुन तथा नीति नियमलाई समय सापेक्ष सुधार गर्दै उद्योग व्यवसाय प्रवद्र्धन गर्न सरकारसँग आग्रह गरे ।
संघका महासचिव एवं प्रवक्ता संजय लामाले यस प्रदर्शनीस्थलमा सामान खरिद गर्नका लागि खुला बजार पनि सञ्चालन हुने र प्रवेश निःशुल्क गरिएको बताए । उनले एक्स्पो अवधीघर करिब ५० हजार भन्दा बढीले अवलोकन गर्ने अपेक्षा गरिएको बताए । उनले प्रदर्शनीस्थलमा वास्तु तथा इन्टेरियर डिजाइनका लागि विशेष परामर्श सेवा पनि उपलब्ध गराईएको जानकारी दिए ।
एक्स्पो उद्घाटन कार्यक्रममा नेपाल उद्योग वाणिज्य महासंघका बरिष्ठ उपाध्यक्ष अन्जनकुमार श्रेष्ठले स्वदेशमा वर्षेनी अर्बौको काठ कुहिएर गइरहेको र फर्निचर तथा फर्निसिङका उत्पादन बनाउन विदेशी काठ आयात गर्नुपर्ने अवस्थालाई सुधार गर्न सरकारको ध्यानाकर्षण गराए ।
उनले उद्योग व्यवसायलाई सरकारले संरक्षण र सहयोग नगरेको भन्दै पछिल्ला दिनहरुमा अवलम्बन गरिएका नीति तथा व्यवस्था तत्काल संशोधन गर्न सरकारसँग आग्रह गरे । उनले उद्योग व्यवसाय बन्द हुने अवस्थामा पुग्दा मुखदर्शक भएर नबस्न पनि सरकारको ध्यानाकर्षण गराए ।
नेपाल चेम्बर अफ कमर्शका उपाध्यक्ष कमलेश कुमार अग्रवालले बैंक वित्तीय संस्थाले आफुखुसी तर्जुमा गर्ने नीति नियमका कारण उद्योग व्यवसाय धरापमा परेको भन्दै सरकार र नेपाल राष्ट्र बैंकको ध्यानाकर्षण गराए । फर्निचरजन्य उद्योगलाई फरक व्यवहार गर्ने काम भएको भन्दै एकनाशको व्यवहार गर्न आग्रह गरेका उनले समग्र उद्योग क्षेत्रलाई घेराबन्दीमा पार्ने काम सरकारबाट नै भएको आरोप लगाए ।
नेपाल फर्निचर तथा फर्निसिङ व्यवसायी महासंघका अध्यक्ष सुजिल श्रेष्ठले फर्निचर व्यवसायीलाई स्वदेशी काठ खरिदका लागि लिलामीमा सहभागी हुन नपाउने व्यवस्था अव्यवहारिक भएको भन्दै यस्तो विभेदकारी नीतिको अन्त्य गर्न माग गरे । बैंकको मोनोपोली, उद्योग सञ्चालन गर्ने स्थानको अभाव, तयारी वस्तुमाभन्दा कच्चा पदार्थमा लगाइएको अधिक भन्सारले उद्योग सञ्चालन गर्न असहज भएको उनको गुनासो थियो ।
यस एक्स्पोलाई किङ कोयलले शीर्ष प्रायोजन गरेको छ । यसैगरी, प्रेष्टिज कार्पेट एशोसिएट पार्टनर रहेको छ । एक्स्पोको पावर्ड वाईमा फर्निचर हब प्रालि रहेको छ । नेपाल चेम्बर अफ कमर्श र नेपाल फर्नचर तथा फर्निसिङ व्यवसायी महासंघले सहकार्य गरेको एक्स्पोको मेन स्पोन्सर्समा डल्फिन मोड्युल्ड फर्निचर, फिदरलाइट, आरओके प्रोडक्ट इण्डष्ट्रीज, सरावगी ओभरसीज् र यती पोलिकेम रहेका छन् । इभेन्ट सोलुसन प्रालिले व्यवस्थापन गरेको एक्स्पोको अफिसियल पार्टनरमा लङसे, भिवोन चियर र वेबट्युन रहेका छन् ।
एकसय भन्दा बढी स्टलहरु रहेको एक्स्पोमा फर्निचर तथा फर्निसिङ सामग्री, उत्पादक, आयातकर्ता, वितरक, मेसिनरी तथा प्रविधि हस्तान्तरण, डिलर र व्यवसायीहरुले आफ्ना उत्पादन तथा सेवाका बारेमा जानकारी तथा बिक्री बितरण हुने संघले जनाएको छ ।
फर्निचर र फर्निसिङ सामग्रीका उत्पादक, मेसिनरी आपूर्तिकर्ता, आयातकर्ता, वितरक, डिलर, इन्टेरियर डिजाइनर, स्टार्टअप तथा फर्निचर उद्योगमा काम गर्न इच्छुक सबैलाई साझा प्लेटफर्म प्रदान गर्न र अर्थतन्त्रलाई चलायमान बनाउन टेवा पुग्ने अपेक्षा सहित एक्स्पो आयोजना गरिएको सो संघले जनाएको छ ।