११ साउन/अर्थ र व्यापार – काठमाडौं महानगरपालिकाले तोकिएको अवधिभित्रै आफ्नो व्यवसायको कर बुझाउने नियमित करदातालाई आगामी पुस मसान्तसम्म कर तिरे १० प्रतिशत छुटको अफर दिने भएको छ ।
काठमाडौ महानगरपालिकाको राजस्व विभागले बिहीबार यस्तो सूचना जारी गर्दै आफ्ना करदातालाई यो अफरको उपयोग गरि अहिले तोकिएको समयभित्र कर बुझाएर छुट सुविधा लिन पाउने व्यवस्था गरिएको जनाएको छ ।
जसकालागि महानगरपालिकाले तीर्न/बुझाउनुपर्ने सम्पत्ति कर÷बहाल कर÷व्यवसाय करमा दिएको छुट सुविधा लिन आग्रह गरेको छ । सम्पत्ति, व्यवसाय र बहाल कर नियमित तिर्नेलाई आगामीे पुस मसान्तसम्म तिरेमा चालु आर्थिक वर्षको कर रकमको १० प्रतिशत छुट हुने महानगरपालिकाद्धारा जारी सूचनामा उल्लेख छ ।
यसैगरी, महानगर क्षेत्रभित्र सञ्चालन भएका होटल, रिसोर्ट वा चलचित्र घरको नाममा घरजग्गा भई वा भाडामा लिएर होटल, रिसोर्ट वा चलचित्र घर निर्माण गरी सञ्चालन गरेको करदाताको हकमा बक्यौतासहितको सम्पत्ति कर चालु आवको पुस मसान्तभित्र चुक्ता गरेमा थप ३० प्रतिशत छुट सुविधा रहेको महानगरको राजस्व विभागले जनाएको छ ।
त्यसैगरी, महानगरपालिकाको राजस्व विभागले व्यावसायिकरुपमा गाडीको पार्किङ प्रयोजनका लागि भवन निर्माण गरेमा भवन निर्माण सम्पन्न भएको मितिले पार्किङ प्रयोग हुने क्षेत्रको १० वर्षसम्म सम्पत्ति कर छुट हुने व्यवस्था समेत गरिएको बताएको छ ।
‘एक वडा, एक नमूना उद्यम’ कार्यक्रम अन्तर्गत सञ्चालित उद्योग वा व्यवसायको दर्ता भएको तीन वर्षसम्म बुझाउन पर्ने व्यवसाय कर र दर्ता शुल्कको कर ९५ प्रतिशत छुटको व्यवस्था छ ।
चालु आर्थिक वर्ष २०८०/८१ करको दायरामा नआएका जुनसुकै उमेरका महिला, जनजाति, दलित, अपाङ्गता भएका र ३५ वर्षभन्दा कम उमेरका युवाका नाममा दर्ता भई सञ्चालनमा रहेका पाँच लाख रुपैयाँसम्म पुँजीगत लगानी भएका उद्योग, व्यवसाय, कम्पनी, संस्थाले आगामी पुस मसान्तभित्र कर दाखिला गरेमा जम्मा कर रकमको ४० प्रतिशत र नियमित कर दाखिला गर्ने करदाताका हकमा करको रकम २५ प्रतिशत छुट हुने महानगरपालिकाले जनाइएको छ ।
तर, यसमा काठमाडौं महानगरपालिकामा स्थायी बसोबास भएका व्यक्तिलाई भने करमा ५० प्रतिशत छुट हुने व्यवस्था भएको सो सूचनामा उल्लेख छ ।